Nagpasilab og 24 puntos ug siyam ka rebounds si Bam Adebayo aron pangulohan ang Miami Heat sa pagsunog sa hosts Brooklyn Nets, 106-93, kagahapon, Oktubre 28, 2021 (RP time), sa National Basketball Association (NBA) 2021-22 season.
Ang Heat, nga ningkatkat sa 3-1 nga rekord, nakadawat sab og 17 puntos gikan ni Jimmy Butler, 15 gikan ni P.J. Tucker ug 14 matag usa gikan nila ni Tyler Herro ug Dewayne Dedmon.
Ang Nets, nga nahagsa sa 2-3 nga baraha, gipangulohan ni Kevin Durant pinaagi sa iyang 25 puntos ug 11 rebounds, nitampo og 15 puntos si Joe Harris samtang nitunol og 14 puntos si James Harden.
Wala pa man tuod nakapagawas ang Nets og katakos nga makabarog sa ilang dungog isip usa sa sayong mga paborito nga makalangkat sa korona apan malaumon si Durant nga motunhay ra ang dagan sa ilang puwersa.
“I like how we’re playing defense the last couple games,” asoy ni Durant. “I like where our defense is trending. I feel like we’re generating good shots. We’re just not knocking them down. If we continue to generate good shots we’ll put ourselves in good position.”
Hinuon, dili ikalimod nga naglisod pa ang Nets sa pagtapak sa haw-ang nga nabiyaan sa ilang pambatong pointguard nga si Kyrie Irving, kinsa gidid-an pagduwa sa team management gumikan kay wala kini nagpabakuna batok sa Covid-19.
Sayod man tuod nanginit sila si Durant ug Harden apan nakamaneho gihapon ang Heat pag-angkon sa labaw, 51-49, sa halftime pinaagi sa ilang pagpanghawod sa ilawom nga bahin, sa second-chance points, ug rebounds.
“We have a bunch of like-minded guys,” asoy ni Heat coach Erik Spoelstra. “(That’s) the way those guys are hard-wired.”
Hinayhinay nga ningbiya ang Heat sa 3rd quarter hangtod nga ilaha nang nakontrolar ang duwa sa hinapos nga bahin.
Sa kinatibuk-an, gipanglubong sa Heat ang Nets sa pinuntosay sa ilawom nga bahin (48-34), second-chance points (31-4), ug rebounds (62-42).
“Overall a consistent theme was second-chance opportunities,” asoy ni Harris. “When you look up and the shot margin was as big as it was, it’s really hard to beat good teams. That was a problem a lot of last year and it’s been a problem a lot of this year so far.” (AP)