Kapin pa lang sa tulo ka semana gikan nga opisyal nga gibuksan ang bag-ong kalingawan o suroyanan sa isla sa Olango, sakop sa Dakbayan sa Lapu-Lapu.
Dili angay ikalisang ang pangalan nga ‘shark’ iho o pating kay luwas ang maong lugar nga kaligo-an.
Gawas lang sa life size nga iho nga gipahiluna sa swimming pool area apan usa lang kini ka estatuwa.
Aduna sab silay gi-display nga stuff marine animals sa ilang receiving area.
Sa mga interesado nga mopalayo sa kasamok sa siyudad ug buot nga maglulinghayaw nga layo sa siyudad, perfect ang maong lugar uban sa inyong mga mahal sa kinabuhi sama sa pamilya, barkada lakip na ang inyong ka char-char.
ASA DAPITA?
Sa wa masuheto, ang The Shark’s Resort nahimutang sa amihanang-silangang bahin sa isla sa Olango sa Barangay Ibabao, Barangay Caw-oy.
Manukad sa mainland Lapu-Lapu mahimong mosakay sa pumpboat sa Angasil Port, Barangay Mactan nga motadlas sa Hilutungan channel ug modunggo sa Santa Rosa Wharf.
Ang biyahe molanat lang og 15 minutos paingon o pabalik sa Olango island.
PLETE
Mokabat ngadto sa P30 ang pletihan sa pumpboat sa matag pasahero, ug sa pagdunggo sa pantalan sa Santa Rosa adunay mga traysikol nga nag-atang.
Sagad sa mga traysikol nga inyong ikasabot paingon sa inyong destinasyon adunay pletehan nga P40 matag tawo.
Pag-abot sa lokasyon sugaton mo sa ilang ma-abi abihon nga mga staff nga mogiya o mamahimong inyong mapangutana sa accommodation nga inyong gusto.
Ang maong establisemento gipanag-iya Bro. Roel Mascariol nga taga-Pilar, Isla sa Camotes, Sugbo.
Ang mga resort gisugdan og tukod niadtong buwan sa Pebrero ning tuiga ug niadtong Oktubre 2 ang opisyal nga pag-abli niini ngadto sa publiko.
RATES / FEES
Entrance fee sa The Shark’s alang sa hamtong: P200, P150 niadtong nagpangidaron og 4 – 12 years old samtang libre sa mga bata nga nag-edad og tres anyos pa-ubos.
Good news alang sa mga senior citizens tungod kay nagtanyag sila og diskuwento nga 20 porsento aron nga sila si lolo ug lola ma-enjoy na, makadaginot pa.
Adunay 14 ka rooms alang niadtong buot mag-overnight stay. Room rates nagsugod sa P2,888 ngadto na sa P6,500 depende sa room capacity nga i-avail.
Kadtong grupo nga magdala sa ilang kaugalingong pagkaon atol sa ilang outing adunay tag-P100 nga corkage fee sa matag klase sa pagkaon, samtang P500 kon magdala og tibuok nga lechon (baboy).
Dili maguol sa kadtong mahiligon og milk tea kay mo-serve sila sa maong matang sa pabugnaw.
Aduna sab silay cottages, audio-visual room ug open air function hall alang sa dinaghan nga grupo.
Sa dili madugay ilang ablihan ang ilang “Mama Shark Cuisine” nga moserve og mga lami-ang putahe.
KONTAK
Alang sa inyong dugang mga pangutana o reservation mamahimong motawag sa mobile number: Smart 0970-629-9087 o Globe 0966-247-4218 o sa email address nga thesharksresort@gmail.com.