Bukas gihapon alang sa mga managkot ug mobisita ang mga sam-ang sa lungsod sa Pilar, mga isla sa Camotes karong Nobiyembre 1 ug 2.
Kini maoy maoy gipahibaw ni Pilar Mayor Manuel Santiago sa Oktubre 28, 2021.
Base sa kamandoan nga giluwatan sa mayor, dili sirad-an ang mga sam-ang sa umaabot nga Kalag-Kalag apan kinahanglan ang pagsunod sa mga health protocols ug restrictions nga ipatuman.
Ang Department of the Interior and Local Government (DILG) una na nga miluwat og kamandoan nga pasirad-an ang tanan nga mga sementeryo gikan sa Oktubre 29 hangtod na sa Adlaw sa mga Santos ug mga Kalag.
“All LGUs are enjoined to adopt and implement ordinances, executive orders, or resolutions restricting access to cemeteries, memorial parks, columbaria for a period of five days, from October 29 to November 2, 2021,” matod sa kamandoan.
Apan pasabot ni Santiago nga wa siya mosupak sa kamandaon sanglit literal man nga wa gyu’y sira o kural ang mga sam-ang sa lungsod.
“Actually literal nga di gyud na sirado, wa gyud na’y mga kural, way sira, bukas gyud na sila...pag ingon nako nga bukas, meaning ana everybody nga mo bisita ngadto modagkot nga mga Pilaranons maka adto sila, but provided nga mo follow sila sa restrictions nga ipahigayon sa lungsod pinaagi sa PNP ug mga barangay tanod,” matod ni Santiago sa Oktubre 28.
Sa Oktubre 19, gihatagan ni Cebu Governor Gwendolyn Garcia og katungod ang mga local chief executives sa pag desisyon sa kaugalingong lagda nga ipatuman atol sa Kalag-Kalag.
Matod sa mayor nga gawas nga nahimutang sa isla ang iyang pamunoan, menos ra usab ang mga tawo nga moduaw sa mga sam-ang matag Kalag-Kalag. (ANV)