NAA na sa kustodiya sa 1101th Maneuver Company sa Davao de Oro Provincial Police Office isip receiving unit ang kanhi squad leader sa mga rebeldeng New People's Army (NPA) kinsa boluntaryong mitahan sa kaugalingon alas 3 sa hapon niadtong Miyerkules, Oktubre 27, 2021.
Ang surrenderer giila nga si Ondoy Warag Sendaton alyas Gerry, leader sa Squad Uno Abe.
Gibutyag nga si Sendaton boluntaryong mitahan sa kaugalingon ngadto sa mga intel operatives sa 1101st MC nga gipangulohan ni Police Captain Lester L. Naraja, uban sa pakigtambayayong sa Davao de Oro Provincial Mobile Force Company intel personnel ubos sa supervision ni Police Lieutenant Colonel Yancee Butch Golocan, Force Commander, intel personnel sa 115th SAG, 11SAB nga gipangulohan ni Police Lieutenant Rackie Bautista ug lain pang yunit sa kapulisan nga maoy mipahiluna sa pagtahan sa maong rebelde.
Giingong si Sendaton mismo maoy nagpadayag sa iyang personal nga kagustohan nga mobalik sa sabakan sa balaod.
Uban nga gitahan ni Sendaton mao ang usa ka caliber 357 ug usa ka M26A9 fragmentation grenade. (Dexter T. Visitacion)