ALANG sa dugang kapital sa negusyo sa mga miyembro sa lesbian, gay, bisexual and transgender (LGBT) sa Davao City, ang lokal nga panggamhanan ning siyudad mihanyag og financial loan alang sa mga miyembro sa maong komunidad.
Moihap sa 45 ka mga miyembro sa LGBT Davao City Coalition ang naka-avail sa maong financial loan Miyerkules sa hapon, Oktubre 27, 2021.
Gihimo ang distribution sa sulod sa Magsaysay Park nga gipangunahan ni City Social Welfare and Development Office (CSWDO) chief Atty. Marlisa Gallo ug Presidential Commission For The Urban Poor (PCUP) Commissioner Norman Baloro.
Matag usa ka miyembro midawat og P10,000 pinaagi sa Rainbow MagNegosyo program.
Usa kini ka inisyatibo sa City Government of Davao aron nga matabangan ang LGBT community ning siyudad luyo niining pandemya.
Ang loan financial mamahimo nilang bayaran sulod sa duha ka tuig nga way interes. (Jeepy P. Compio)