DILI matugkad ang kalipay nga gibati sa tag-iya sa namatayng iring dihang subli kining nabuhi samtang padung na unta dad-on sa publikong sementeryo sa lungsod sa Compostela, Davao de Oro alas 5 sa hapon, Miyerkules, Oktubre 27, 2021.
Ang tag-iya sa iring nga nagpatago sa pangalang "Jane," 32, negusyante, nagsulti dihang personal nga nahinabi sa Superbalita nga ang iring tulo na ka adlaw nga luya kaayo, nagbarag-barag na kon molakaw ug nagpunay'g sukag kalibang.
Nagtuo si Jane nga maulian ra ang iring sanglit ginapainom niya kini og tambal ug mokaon man sab.
Apan niadtong higayona, nakit-an sa iyang bana ang iring nga nagbuy-od na sa yuta uban sa iyang hugaw nga wa na maglihok sa likod sa ilang pinuy-anan.
Gidali nilang gihatud ngadto sa buhatan sa Department of Agriculture (DA) ang iring aron matambalan, sanglit nakita ni Jane nga nagginhawa pa kini apan gideklarang dead on arrival sa mga personahe nga mihiling kaniya.
Giingong nahilo ang iring tungod kay nakakaon kini og ilaga nga gihiloan, hinungdan sa iyang kamatayon.
Tungod niini, gisulod na sa tag-iya ang patay nga lawas sa iring sa gamay nga karton aron malubong ug buot ni Jane nga didto ilubong sa publikong sementeryo sa lungsod. Apan supak ang bana niini kay gusto niining ilabay na lang ang iring sa basurahan o di kaha kaha ipaanod sa sapa.
Sa tantong panaglalis ni Jane ug sa iyang bana, nakabati sila og singgit sa ilang anak nga nagkanayon, "Hala, si Kabang mibangon," samtang nagtudlo sa karton nga gibutangan sa namatay'ng iring.
Sa paglingi sa magtiayon, maoy nasagap sa ilang panan-aw ang ulo sa iring nga midungaw sa abli nga karton.
Labihan ang kalipay ni Jane nga nabuhi ang iring ug dako ang pagtuo niini nga ang pagkabuhi maoy ikaduha niining kinabuhi.
Sa pagsuwat ning balita, padayon pang gitambalan ang iring alang sa hingpit niining pagkaayo.