Nagkita na gyud sila si kanhi senador Bongbong Marcos ug si Davao City Mayor Sara Duterte Carpio sa Cebu City niadtong milabay nga semana. Ang mga supporter ni Inday Sara nagtuo nga mahinayon na ang dugay na nilang gipangandoy nga mao ang paglansar sa ilang idolo sa pagka-presidente o kaha bise presidente ni Marcos. Apan nabawo na usab sila kay wala man gayuy timailhan nga mausab ang baruganan ni Duterte nga magpapili pag-usab pagka-mayor sa Davao City. Si Cebu Governor Gwendolyn Garcia nga personal nga nakahinabi ni Duterte misugilon ngadto kang presidential spokesperson Harry Roque nga “the ship has sailed” nga masabut nga dili na mausab ang desisyon sa mayor. Nasayran usab nako gikan sa usa ka kandidato nga nakatambong sa maong panagpundok nga dili gayud modagan og national position si Inday Sara. Bisan si presidential candidate Bato dela Rosa sa PDP – Laban (Cusi wing) misugilon usab nga mibalibad kini sa pagdagan og national position. Mao usab kini ang gipahibawo ni Presidente Rodrigo Duterte nga dili na modagan pagka-presidente si Sara sa umaabot nga piniliay.
Ako nagtuo nga gipanguyawan sab si Marcos kon unsay desisyon ni Inday Sara. Kay kon makahukom kini nga modagan pagka-presidente guba na ang iyang damgo nga dili maka-atbang ang mga Duterte hinuno-a gusto niyang mahimong runningmate ang amahan, si Digong.
Bisan kon mao kini ang sitwasyon sa pagka-karon dili pa masiguro nga dili na mausab ang hunahuna sa mayor labina og pugson gayud sa pamilya. Mahibaw-an ra kini human sa Nobiyembre 15, 2021. Posible pa gani hinuon nga si Senador Bong Go maoy mo-substitute kang Bato pagka-presidente unya pulihan siya ni Digong pagka-bise presidente.
* * *
Dinhi sa dakbayan sa Sugbo tulo ka kandidato ang milansar sa pagka-bise mayor. Sila mao si Konsehal Raymond Alvin Garcia sa Barug – PDP-Laban, Konsehal Franklyn Ong sa BO-PK ug si former DILG undersecretary Bimbo Fernandez sa Liberal Party. Si Fernandez dugay nga nagserbisyo kang kanhi mayor Tomas Osmena isip city administrator hangtud natudlo siyang DILG undersecretary. Wala siya molansar pagka-mayor kay mabangga man niya ang asawa sa iyang amo kaniadto nga si Margot Osmeña nga maoy standard bearer sa BOPK. Kining kandidatura n Fernandez makakuha og botos gikan sa mga dumadapig ni Osmena. Ambut og unsaon kini pagsulbad sa BO-PK.
Samtang walo ang mikandidato sa pagka-mayor si Cebu City. Sila si Acting Mayor Mike Rama sa Barug – PDP-Laban, Margot Osmena sa BO-PK, Jose Layon, sa Reporma, Michael Matanoza ubos sa Abag-PROMDI. Konsehal Dave Tumulak, Crisologo Saavedra, Edgar Concha ug Juanito Luna, pulos independent. Ang hugot nga magkaribal niini mao sila si Rama ug si Osmeña.(mannyrabacal1144@gmail.com)