Gipahinumdoman ni Senator Manny Pacquiao ang mga Sugbuanon sa kasakit ug pag-antos sa katawhan niadtong panahon sa Martial Law atol sa iyang pagbisita kagahapon sa Sugbo, Oktubre 28,2021.
Si Pacquiao, kinsa magpapili pagka presidente sa nasod sa umaabot nga eleksyon sa 2022, nibisita sa Sugbo ug nihapit sa marker ni Father Rudy Romano sa Barangay Tisa, Dakbayan sa Sugbo.
Ang retiradong boksidor nagdala og buwak ug gihalad sa marker sa kanhi pari nga Redemptorist, kinsa wala maapil sa pag-aresto panahon sa Martilaw Law apan gikidnap niadtong Hunyo 11, 1985 sa naasoy nga dapit ug missing hangtod karon.
“Hindi natin pwede kalimutan ang mga pangyayari, kumbaga sa sugat may marka yan kahit gumaling ang sugat may marka parin yan,” padayag ni Pacquiao.
Si Romano usa sa mga kritiko sa rehimen ni kanhi Presidente Ferdinand Marcos, amahan ni Bongbong, panahon sa Martial Law ug naila nga tigpanalipod sa katungod sa katawhan.
Ang senador niingon nga dili personalan ang iyang pagsaway sa bati nga binuhatan panahon sa Martial Law apan angay ipatigbabaw kanunay ang kaayohan sa katawhan.
“Huwag nating kalimutan pahalagahan ang karapatan ng bawat isa. Nothing personal pero yong karaptan ng tao ang pinaglalaban natin dito,” Dugang ni Pacquiao kinsa nianhi sa Cebu para motambong sa birthday sa iyang higala.
Ang komentaryo ni Pacquaio nitumaw usa ka semana ang nakalabay dihang nibisita si kanhi Senador Ferdinand 'Bongbong' Marcos, anak sa kanhi presidente nga nagdeklarar sa balaud militar niadtong 1972 hangtod sa 1981. Napalagpot sa pwesto si Marcos pinaagi sa People Power sa 1986.
Si Pacquiao, standard-bearer sa PDP-Laban Senator Koko Pimentel wing, nibutyag nga kon siya ang mahimong sunod nga presidente sa nasod, ang Cebu himuan niya og subway traffic system sama sa ubang malambuong nasod sa kalibotan.
Matod niya, haom ang maong proyekto para mosamot pa og lambo ang ekonomiya sa dakbayan ug lalawigan sa Sugbo. (PAC)