Ang Cebu City Government wala pa mamakuna og third dose sa vaccine sa ilang mga lumolupyo aron mapanalipdan batok sa pagkatap sa coronavirus disease 2019 (Covid)-19.
Kini ang gibutyag ni Dr. Jeffrey Ibones, pangulo sa City Health Department (CHD) sanglit wala pa sila makadawat og guidelines gikan sa Department of Health nga maoy lead agency sa vaccination rollout sa nasod.
Si Ibones niingon nga bisan sila nga mga health care worker, wala sila magpabakuna sa third dose nga maoy gihulagway nga booster shot aron hingpit nga protektahan ang lawas batok sa virus.
Ang pangulo sa CHD nagkanayon nga kon adunay mga private vaccination site nga nag-implementar sa booster shot wala na sila mahibawo niini.
“Di ko kaingon nga wala (booster) kay di man mi kabantay but kon akoy pangutan-on dili gyud allowed kay kami sa CCHD ug sa City Government we are bound to follow the guidelines kon unsay gi set,” dugang ni Ibones.
Sa kasamtangan, ang Cebu City adunay 416,430 ka doses nga na-administer samtang 354,785 ang nakakumpleto sa ilang second dose gikan sa 787, 479 ka mga tawo sa dakbayan kinsa nagparehistro sa Pabakunata.com. (PAC)