NAHATAGAN na og bakuna ang 110 ka barangay sa Dakbayan sa Ormoc, sigon ni Ormoc City Health Department spokesperson Jester Zacarias.
Sa Oktubre 29, 2021, katapusan nga hatagan ang Barangay Liberty ug Quezon Jr.
"Mao nalang ni siya ang last two barangays nga ato hatdan then mo balik mi sa uban nga barangays by November for the second dose,” matod ni Zacarias.
Target population
Base sa record sa City Health, ang Ormoc City dunay total population nga 240,453 ug 146,532 niini nag edad 18 pataas.
Target nga bakunahan ang 90 porsyento sa 146,532.
"So, ang ato target bakunahan is 131,879 unya ang gipangita nalang nato karon ang 32 thousand nga ato giyahan or i-advice magpabakuna,” matod ni Zacarias.
Alang sa Oktubre 27, 2021, naa na sa 162,939 doses sa bakuna ang natupok.
Walk-in vaccination
Gipahibalo usab ni Zacarias nga giandam nasab nila karon ang pagbutang og usa ka lugar alang sa walk-in vaccination.
"After nato mahatdan og bakuna ang tanan barangay, mag butang ta og usa ka lugar sa Ormoc para sa walk-in. Kadtong mga wala makatungha sa ila second dose, pwede ra mo walk-in. Then naa sab mi schedule walk-in for first dose,” matod ni Zacarias.
Matod ni Zacarias, ilang gipaniguro nga sa Disyembre mabakunahan gyod ang 131,879 nga target population.
Bakuna para sa mga bata
Gisulti usab ni Zacarias nga nakakuha na sila og datos para sa pagbakuna sa mga bata edad 12 hangtud 17.
"Sa pagka karon, nangayo na ta og masterlist sa ato tagsa tagsa ka barangay para sa 12 to 17 years old,” matod ni Zacarias.
Sa 110 ka barangay sa Ormoc, 85 na ang nagsumite og masterlist ug naa sa dul-an 10,000 ka bata ang naa sa lista.
"Dili pa gud ni siya 100 percent pero andam na ato data kung magsugod na ang pagbakuna sa mga bata,” matod ni Zacarias.
Giklaro ni Zacarias nga dili sab tanan nga bakuna ang iturok sa mga bata. Kadto lang dunay approval for emergency use.
"Dili tanan bakuna ang pwede itupok. Kadto lang approved for emergency use like pfizer ug moderna. Sa pagka karon, wala pa man sab ta pfizer ug moderna,” pasabot ni Zacarias.
Kung magsugod na ang pagbakuna sa mga bata, unahon kadtong dunay comorbidity ug adto dapat sa hospital ang pagbakuna.
Mag-meeting pa ang local government unit ug ang mga opisyal sa hospital nga himuon nga vaccination site sa mga bata. (JKDP)