Mga priso nga babaye lingaw sa ‘Squid Game’

NALINGAW ang mga babayeng inmates sulod sa Davao City Jail sa Maa atol sa pagsaulog sa Davao City Jail Female Dormitory sa National Correctional Consciousness Week 2021.

Ilang gidula ang sikat nga Netflix series nga "Squid Game" nga maoy nakapabibo sa ilang selebrasyon.

Walay kabutangan sa kasadya sa mga female inmates diin dunay nakabantay kanila nga mga guwardiya nga nakasuot og personal protective equipment ug dunay dalang dulaan nga pusil.

Lakip sa gidula ang Tug of War ug Red Light, Green Light nga may nakatindog nga monyeka.

Samtang wa paulahi ang mga taga Bureau of Jail Management and Penology nagdula sab og Dalgona Candy game.

Ang National Correctional Consciousness Week ginasaulog matag katapusang semana sa Oktubre kada tuig aron awhagon ang mga Persons Deprived of Liberty nga moapil sa mga nagkalain-laing aktibidad. (Jeepy P. Compio)