MOKANTIDAD sa sobra P1.1 milyon nga shabu ang nakumpiska sa awtoridad sa usa ka joint operation sa Technical Support Company, Regional Drug Enforcement Unit (RDEU)-Davao ug sa Buhangin Police Station batok sa usa ka drug lord nga alyas Madam.
Ang buy-bust natigayon pasado alas 9 sa gabii, Huwebes, Oktubre 28, 2021 didto sa Purok 1, Talomo, Salakot, Barangay Talomo Proper, Davao City.
Ang operasyon gipangunahan sa RDEU-Davao sa pagpanguna ni Police Lieutenant Welquin Enciso ubos sa superbisyon ni Police Lieutenant Colonel Ronald Lao. Naa sab ang Technical Support Company sa panguna ni Police Major Jimmy Evangelista ug sa Buhangin police pinaagi sa acting station commander Police Major Bernie Suaga.
Nasayran nga kung wala pa nakumpiska ang daghang shabu ni alyas Madam, posible nga makatag kini sa Davao City ug sa mga kasikbit.
Gawas sa mga nakumpiska, narekober sab ang marked money ug cellphone nga maoy gigamit sa transaksyon tali sa suspek ug nagtakuban nga pulis.
Sumala sa kapulisan, taud-taod na sab nilang gipanubayan ang lihok sa suspek hangtud nga nakigtransaksiyon na kini sa poseur buyer nga miresulta sa iyang pagkasikop.
Kini ang resulta sa hugot nga pagbantay sa awtoridad nga dili masudlan og ilegal nga druga ang dakbayan sa Davao labi na nga daghan og mga barangay ang gideklara sa Philippine Drug Enforcement Agency nga drug-free. (Jeepy P. Compio)