KAPIN 700 ka mga helmet shell o budyong ang nasakmit sa lokal nga kagamhanan sa lungsod sa Bantayan, Bantayan Island niadtong Huwebes, Oktubre 28, 2021.
Ang budyong gikonsiderar nga endangered specie.
Nasakmit ang 737 ka budyong atol sa operasyon nga gipangulohan sa Maritime Law Enforcement Team, Bantay Dagat, ug Municipal Agriculturist-Fisheries Office sa Sitio Tabunok, Barangay Lipayran, Bantayan.
Sumala pa sa report sa Maritime Police, ang maong mga kontrabando nga gisulod sa 48 ka sako nakit-an nga gi-abandona sa baybayon sa maong isla.
Gibana-bana nga mokantidad kini ug P365,000.
Ang budyong nga usa sa labing talagsaon nga sea shells dili mahimo nga hiposon, ibaligya, ug itransport.
Sumala sa Republic Act (RA) 8550 kon Philippine Fisheries Code, ang pagkuha sa mga talagsaon o endangered species usa ka kalapasan ug adunay multa nga P500,000 ngadto na sa P5 million.
Ubos sa maong balaod, aduna usab kini’y silot nga pagkabilanggo gikan sa 12 ngadto na sa 20 ka tuig.
Sa kasamtangan, ang nasakmit nga budyong anaa sa opisina sa Maritime Police ug gikatakda nga dad-on sa buhatan sa Bureau of Fisheries and Aquatic Resources (BFAR) Central Visayas sa Cebu City.
“Hinaut unta nga ang maong insidente magsilbi nga warning alang niadtong mga tawo nga nagbuhat og illegal,” sumala pa ni Mayor Arthur E. Despi, kansang administrasyon mihingusog sa kampanya batok sa illegal fishing aron mapanalipdan ang marine resources sa lungsod.
Si Despi mipahinumdum usab nga ang tanang kalihokan sa pangisda gikinahanglang nahasubay sa saktong regulasyon. (PR)