Motuo ba kamo nga mobalik ang mga kalag, unya mag-multo?
Kalag-kalag karon. Apan sa ikaduhang tuig sagunson, gipasirad-an sa Inter-Agency Task Force (IATF) for the Management of Emerging Infectious Diseases ang mga menteryo gikan sa Oktubre 29 hangtod sa Nobiyembre 2.
Busa, di ta makabisita sa lubong sa atong mga minahal sa kinabuhi. Turno na karon sa mga kalag sa pagbisita sa ilang mga paryenteng buhi pa. Bawos-bawos ba.
* * *
Gihangyo ni acting Cebu City Mayor Mike Rama ang IATF nga ipabiling bukas ang mga menteryo, memorial parks ug mga columbaria sa siyudad sa Nobiyembre 1 ug 2.
Ang bugtong kondisyon mao nga kadtong kompleto na sa bakuna mao ray makasud sa mga menteryo. Apan gibalibaran siya, sumala pa ni Cabinet Secretary Karlo Nograles, co-chairperson sa IATF.
“Dili lang usa ta mamugos,” matod pa ni Rama. Apan unsa kahang alegreha sa mga balay kon mobalik ang mga kalag.
* * *
Dihay duha ka mga kalag nga nag-estoryahay kon unsay ilang namatyan. Kalag 1: “Ako, na-frozen ko sud sa refrigerator. Nagkurog ko sa katugnaw ug wa na ko kaginahawa.”
Kalag 2: “Pag-uli nako gikan sa trabaho, nakakita kog sapatos nga dili ako. Nidagan ko sa kuwarto sa akong asawa, hubo siya ug nagkurog. Giutingkay nako ang tanan sa balay apan wa koy tawo nga nakit-an. Nihuot akong dughan ug giatake ko sa kasingkasing.”
Kalag 1: “Dimalas gyud tang duha. Kon imo pang giablihan ang refrigerator ug niinom kag tubig bugnaw, buhi pa unta ta karon.”
* * *
Managlahi ang kalibotan sa mga patay ug ang kalibotan sa mga buhi. Ang taytayan kanila mao ang gugma.
Matod pa ni Thornton Wilder, “There is a land of the living and a land of the dead and the bridge is love, the only survival, the only meaning.” Alang sa mga buhi, ang atong mabuhat mao ang paghinumdom sa mga patay na. Matod ni Cicero, “The life of the dead is placed in the memory of the living.”