GIBANTAYAN sa mga awtoridad ang posibleng panimalos sa mga teroristang Dawlah Islamiyah Terror Group (DI) ug Bangsamoro Islamic Freedom Fighters (BIFF-Karialan faction) sa pagkamatay sa taas nilang lider niadtong Sabado sa kaadlawon, Oktubre 30, 2021.
Napatay sa nahitabong engkuwentro tali sa militar mao si Hassan Salahuddin alyas Kumander Orak nga giilang lider o Amir sa DI ug sa BIFF-Karialan faction. Apil nga napatay mao ang asawa niini nga si Jehana Minbida nga giingong finance officer sa grupo.
Giingong nasiplatan sa mga molupyo sa Sitio Pinaring, Barangay Damablac, Talayan, Maguindanao Province nga subling nagtapok-tapok ang grupo sa DI ug BIFF ug nagplanong maglusad og halapad nga pagpangatake.
Gilusad dayon sa 1st Mechanized Brigade uban ang kapulisan ang law enforcement operation sa maong dapit, hinungdan sa panag-engkuwentro nga maoy hinungdan sa kamatayon sa mga suspek.
Narekober sa militar sa balay ni Hassan ang usa ka 5.56mm R4 rifle, bandoliers, mga bala, war materials ug mga dokumento sa mga terorista.
Gikompirma ni 6th Infantry (Kampilan) Division Chief ug Joint Task Force Central Commander Major General Juvymax Uy nga si Hassan nalambigit sa pagpamomba sa nagkadaiyang dapit sa Maguindanao ug North Cotabato, lakip na sa Davao City.
Naa karon sa heightened alert ang militar ug kapulisan sa Maguindanao Province aron nga pangandaman ang posibleng pag-atake sa mga terorista isip bawos sa napatay nilang lider. (Edgar E. Fuerzas)