HINGPIT nang namaayo ang iring nga unang gitahong namatay ug nabuhi human sa pila ka adlaw nga pag-asikasog pag-amuma sa tag-iya niini didto sa lungsod sa Compostela, Davao de Oro.
Gisulti sa tag-iya sa iring nga si alyas Jane dihang subling nahinabi sa Superbalita Davao nga nagtuo sila nga niadtong higayona diin napalgang patay ang maong iring nga ginganlan og Kabang nga nahagbong kini gikan sa atop sa ilang balay ug napantok ang ulo sa semento.
Butang nga matud pa gipamatud-an sa manghilotay nga nakiusyoso sa iring nga misulti nga dunay piang ang tuong abaga sa iring ug bun-og sa tuong paa, hinungdan nga gihilot niya kini og gihampulan sa dahon sa Mayama.
Dugang gibutyag ni Jane nga gipainom sab niya si Kabang og tabletas nga gidugmok ug gisagol sa tubig mainom aron mamaayo ang kalibanga niini.
Ang maong tabletas matud pa mao sab ang ilang ginainom sa iyang pamillya sa higayon nga sila kalibangaon (Diatab).
Gipasalamatan usab ni Jane ang binuhi nilang iro nga ginganlan og Blessy nga sumala pa mitabang pag-atiman kang Kabang hangtud naulian kini sa hingpit.
Gawas kang Kabang, duna pay laing lima ka mga iring si Jane ug usa ka iro nga pulos mga "adopted" sanglit nangabot sa ilang panimalay nga wa damha apan giisip nga kabahin sa ilang pamilya.
Alang kang Jane, ang tinud-anay nga pag-amuma, sakripisyo ug pagmahal ang hinungdan nga naulian ug namaayo sa hingpit si Kabang. (Dexter T. Visitacion)