Mayor Labella naospital og balik; Rama moasumir isip full mayor

Moasumir sugod karong adlawa, Nobiyembre 1, 2021, isip “full mayor” si Acting Mayor Michael Rama.

Gipahibawo kini ni Rama atol sa interbyu sa Superbalita Cebu sa Dominggo sa gabii, Oktubre 31, 2021 dihang gisuwayan siyag kuha og kompirmasyon sa taho kalabot sa pagka ospital na usab ni Mayor Edgardo Labella.

Matod ni Rama, base sa Local Government Code, kon molapas na og 30 ka adlaw ang leave of absence sa usa ka local chief executive, ang acting mayor "maka-exercise” na sa “function” sa pagtudlo, pagsuspenso ug pagtaktak og kawani ug opisyal.

Si Rama nipasabot nga nagkinahanglan kini og dinaliang pagtagad kay duna nay mga posisyon sa city hall nga kinahanglang duna nay matudlo human ni-resign ang naglingkod niini.

Matod niya, nakabalda kini sa mga gimbuhaton sa mga departamentong hingtungdan.

Dihang gipangutana sa Superbalita Cebu kon nakaabot na ba og 30 ka adlaw ang leave ni Labella, matod niya nga “ugma na man tingali, November 1.”

Apan ang indefinite leave ni Labella aron magpaalim sa iyang sakit nagsugod niadtong Oktubre 8, 2021.

Busa, kon basehan ang 30 ka working days sumala sa nalatid sa balaud, sa Nobiyembre 18 pa “makaasumir” si Rama kana kon si Labella di mobalik hangtod mapupos ang tagal sa balaud.

Base sa nalatid sa Section 46, paragraph A sa Local Government Code, kon nilapas na ang leave sa mayor og 30 ka working days, ang gahom sa pagtudlo mahimo na sa acting mayor.

“Thus if the period of temporary incapacity exceeds thirty (30) working days, the Acting Mayor may already proceed to execise such functions so as not to impair the delivery of vital public services,” matod sa probisyon.

Apan kinahanglan kining masubay sa mga lagda nga nalatid sa Civil Service Commission (CSC).

Base sa samang probisyon, ang acting mayor makabuhat sa tanang mga gimbuhaton sa usa ka mayor gawas lang sa pagtudlo, pagsuspenso ug pagtaktak.

Samtang, si City Administrator Floro Casas nikompirmar sa Superbalita Cebu nga si Labella gidala sa usa ka pribadong ospital sa Sabado, Oktubre 30 tungod sa iyang pneumonia.

Naa ra si Labella sa temporaryong kuwarto, wa sa intensive care unit (ICU) sukwahi sa nanggawas nga mga taho. (REV)