KAGAHAPON (November 1) ang Adlaw sa mga Santos. Karon ang Adlaw sa mga Kalag (November 2). Apan ang gihatagan og pasidungog sa kadaghanan mao ang Adlaw sa mga Kalag. Gani, gitawag ning duha ka adlaw nga "Kalag-Kalag." Apan ang gideklarar sa kagamhanan nga holiday mao ra ang Adlaw sa mga Santos.
Kaniadto sa wala pa ning pandemya sa Covid-19, ang pagsaulog sa "Kalag-Kalag" mora sad og pista kay kadaghanan sa mga pamilya adto magselebrar, kaon ug inom, sa sementeryo o sam-ang sa ilang mga minahal nga mitaliwan agi'g paghandum kanila.
Apan tungod sa pandemya sa Covid-19, sugod niadtong tuig 2020, nga nia pa hangtud karon, gipasirad-an sa kagamhanan ang tanan sementeryo sa nasud atol sa Adlaw sa mga Santos ug Adlaw sa mga Kalag aron malikayan ang pagkuyanap aning makamatay nga Covid-19 bisan kon duna nay bakuna.
Gisirad-an tuod ang mga sementeryo aning duha ka adlaw, apan abli sa miaging mga adlaw diin gitugtan nga makabisita ang katawhan sa lubnganan sa ilang mga minahal sa kinabuhi. Apan, gilimitihan ra ang mga tawo nga makasulod labina sa mga pribado nga sementeryo.
Ang Executive Order ni Acting Mayor Mike Rama, nga ablihan ang mga sementeryo kagahapon ug karon alang lang sa mga bakunado wala giaprobahan sa IATF, nga maoy nagmando nga sirad-an ang mga sementeryo ning Adlaw sa mga Santos ug Kalag.
***
Minilyon na ang miabot nga bakuna nga gidonar sa kagamhanan USA ingon man sa gipalit sa atong kagamahan lakip na niini ang mga pribado nga kumpaniya nga namalit aron mabakunahan ang ilang mga empleyado.
Tungod sa kadaghan na sa bakuna batok sa Covid-19, angayan na nga mandatory alang sa tanan, labina sa mga mamumuo nga nagdili-dili nga mabakunahan nga gisuportahan sa mga labor union ug sa Department of Labor and Employment (DOLE), nga gidepensahan kunohay ang ilang tawhanong' katungod nga dili magpabakuna.
Naproybahan na sa siyensya nga kining bakuna maoy batok sa Covid-19. Sa Amerika, ang kadaghanan sa mga naigo ug namatay sa Covid-19 mao kadtong mga tawo nga di magpabakuna, nga gitawagnga anti-vaxxers.
Di angayan hikalimtan nga duna usab dakong tawhanon katungod ang mga empleyado ug mamumuo nga bakunado na unya matakdan lang sa virus nga gidala sa mga tawo nga wa magpabakuna tungod kay nahadlok sa way pulos nga hinungdan.
Ang management sa mga kumpaniya ug industriya kinahanglan nga imandato na sa mga empleyado ug trabahador ang pagpabakuna tungod kay daghan na kayo ang bakuna nga miabot ug aron ta makalingkawas ani nga kalbaryo ug aron dali nga makab-ot ang gidaghanon sa mabakunahan aron duna na ta unya "herd immunity."
Dako kong supak sa pagbabag sa DOLE ug sa mga Labor Union sa polisiya sa mga kumpaniya ug industriya nga dili makasulod sa trabahao ang mga empleyado o trabahdor nga dili magpabakuna. Wala nay rason karon nga moingon ang DOLE ug mga Labor Union nga kuwang ang bakuna tungod kay miabot na ang minilyon nga donasyon nga bakuna gikan sa Amerika ug ang gipamalit sa atong kagamhanan ug mga pribabdo nga kumpaniya.