Roldan: Kandila sa kahayag

MALINAWONG paghandom sa adlaw sa mga patay. Ikaduhang tuig nga mingaw pa sa namatyan ang pagsaulog nato sa Todos Los Santos tungod sa Covid-19. Hasta ang mga patay napagan sa pandemya nga hangtud karon wa pay saktong solusyon. Bisan epektibo ang bakuna aron dili mograbe ang nataptan, dili kini garantiya nga mahanaw na kini sa kalibutan. Karon nagsugod na ang pagbakuna sa mga batan-ong 12-17 anyos.

Sa ubang nasud nagsugod na pud ang "booster dose" sa nakahuman na'g duha ka tusok. Ambot kaha kung duna bay ikaupat o ikalima? Sulti sa mga eksperto nga hayan may moabot pang balatian nga kumingking ra kining Covid.

Mag-ampo ta nga makakalap na ang siyensa og tambal niining pandemya nga nakapahapla sa ekonomikanhong kalamboan sa kalibutan.

Ug siyempre, apil sa pag-ampo sa mga Dabawenyo nga unta modagan na gayud si Mayor Sara Duterte pagka-presidente.

Niadtong nilabay'ng semana, nagpahigayon og Sara Run Caravan tuyok sa atong siyudad ug adunay gihimong "candle lighting" sa mga berdeng kandila atubangan sa City Hall ning siyudad isip pagpasibaw sa hangyo sa katawhan nga sakop sa lapas 700 ka mga "parallel groups" sa tibuok nasud nga nagsuporta sa kandidatura ni Mayor Sara.

Sa pagdagan ni Mayor Rody Duterte niadtong 2016, mokabat lama'g 300 ang grupo nga nagduso sa iyang kandidatura diin nakakuha siya'g sobra 16 milyon ka boto, wa pay labot niini ang maniubra sa dagdag-bawas sa pikas kampo.

Busa, daghan ang nasayangan kung dili molansad si Mayor Sara kay kini ra ang panahon nga hayag kaayo sa iyang kadaugan. Ang tanang surbey sa nasud nagbutang kaniya nga may pinakataas nga trust rating kung ikumpara sa tanang presidentiable nga nidagan karon. Mao nga bisan unsa na lang ang gibuhat sa iyang mga tigsuporta aron malukmay ang dughan sa Mayora ug mo-desider na kining modagan pagka-pangulo sa 2022 elections.

Ang "best scenario" nga nakita sa iyang mga tigsuporta kay ang pagpuli niya sa usa ka nikandidato karon pagka-presidente pinaagi sa "substitution provision" sa "omnibus election code". Ang posible niyang pilian kay ang bag-o pa lamang namugna nga Partido Pilipino sa Pagbabago (PPP).

Ang ikaduha mao ang Lakas-CMD nga gipangulohan karon ni House Rep. Martin Romualdez, ug siyempre ang PDP-Laban, Cusi wing, diin si Senador Bato dela Rosa ang standard bearer.

Ang ikaduhang "best scenario" kay modagan siya isip "independent candidate" nga mora'g dili na puwede kay nahuman na ang panahon sa pag-file sa "Certificate of Candidacy" niadtong Oktubre 8.

Matud pa sa uban nga milagro na lang ang gikinahanglan aron maliso ang hunahuna ni Mayor Sara nga modagan. Niadtong niaging semana, nidalikyat siya sa Cebu City ug nakit-an nga nakighinabi ni ex-Sen. Bongbong Marcos (BBM). Tungod niini, nikuyanap ang balita nga modagan si Mayor Sara isip bise-presidente ni BMM. Hinuon, wa gihapon nagpadayag ang mayora sa ilang tukmang giistoryahan ni BBM.

Busa kulbahinam kaayo ang Nobyembre 15 kay mao kini ang katapusang adlaw sa "substitution" sa mga kandidato. Dinhi na nato masayran kung "destiny" ba gayud ni Mayor Sara ang pagka-pangulo o iyang sayangan ang higayon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph