DAVAO DE ORO -- Isolated case o walay kalambigitan sa nahitabong pagpamusil sa lungsod sa Monkayo ang nahitabong sunog sa Magnaga Water's Resort sa Barangay Magnaga, Pantukan sayo sa gabii niadtong Sabado, Oktubre 30, 2021.
Kini ang gibutyag ni Governor Jayvee Tyron Uy nga personal nga nahinabi sa Superbalita Davao atol sa launching sa Radio De Oro 104.9 F.M-Pantukan diin ang gobernador usa sa mga halandong dinapit sa maong okasyon.
Gisulti ni Uy nga iyang nakaistorya ang pipila ka mga staff sa resort ug iyang nasayran nga posibleng agiw sa kalayo sa gipahigayong light dancing o electrical fault wiring ang hinungdan sa sunog.
Matud pa nga ang sunog didto nagsugod sa atop sa payag nga gama sa light materials ug daling mikuyanap sa mga kasikbit nga payag.
Gipasalamatan ni Uy ang mayor sa lungsod nga si Roberto Hugo nga daling miadto sa dapit aron sa pagsusi sa hitabo.
Way gikatahong nasamdan o naangol sa insidente.
Wa pa sab matino ang kinatibuk-ang damyos sa sunog sanglit padayon pang giimbestigahan sa Bureau of Fire Protection-Pantukan ang hitabo. (Dexter T. Visitacion)