BANSALAN, Davao del Sur -- Naplastar na ang haya sa patay'ng lawas sa kanhi SunStar Superbalita Davao correspondent nga si Orlando Dinoy sa ilang panimalay sa Rosal Street, Bansalan human kini pusila sa wa pa mailhing mga mamumuno.
Si Dinoy gipusil samtang anaa sud sa iyang giabangan nga apartment sa Mother Ignacia Street, Poblacion Uno, Bansalan niadtong Sabado, Oktubre 30.
Ilubong si Dinoy sa Nobyembre 6, 2021 alas 10 sa buntag didto sa Bansalan Public Cemetery.
Si Dinoy nahimong kabahin sa SunStar Superbalita sa taas nga katuigan diin ning tuiga, giablihan siya sa bag-ong oportunidad sa Newsline Philippines, usa ka Davao-based news outfit.
Sumala ni Newsline Philippines Chief Executive Officer nga si Editha Caduaya, padayon karon ang pagpangita og hustiya sa kamatayon ni Dinoy diin usa ka Special Investigation Task Group (SITG) Dinoy ang gitukod sa Police Regional Office (PRO)-Davao alang sa paspas nga kasulbaran sa kaso.
"We are still in a state of shock as one of our reporters Orlando 'Dondon' Dinoy was gunned down last Friday inside his rented apartment in Bansalan, Davao del Sur. Philippine National Police Regional Director BGen. Filmore Escobal has informed us that Special Investigation Task Group (SITG) Dinoy has been created and assured us of a speedy investigation on the case to unmask the culprit who cowardly killed our helpless reporter," opisyal nga pamahayag sa Newsline pinaagi sa CEO nga si Caduaya.
Bisan si Department of Justice Secretary Menardo Guevarra nagpasalig nga pangunahan sa Presidential Task Force on Media Security ang makuti nga imbestigasyon sa pagpatay kang Dinoy.
Nagpaabot sab og pamahayag ang Task Force nga kung unsa man ang motibo sa krimen ilang ipasalig nga makab-ot ang hustisya sa kamatayon ni Dinoy.
Wala una mihatag og pamahayag ang pamilya sa gipatay nga brodkaster. (Jeepy P. Compio)