GIPAHIBAWO sa lokal nga panggamhanan sa siyudad sa Davao Lunes, Nobyembre 1, nga ang rehistrasyon alang sa pediatric age groups nga 12 hangtud 17 anyos abli na pinaagi sa Safe Davao QR (DQR) Code.
Sa Facebook post, nagtambag ang lokal nga panggamhanan nga kadtong nalakip sa pediatric group kinahanglan nga morehistro na pinaagi sa DQR website: profiles.safe-davao.com.
Aron nga masusi ang gihatag nga impormasyon sa rehistrasyon, mga magparehistro kinahanglan nga maglakip sa ilang balidong ID ug birth certificate gikan sa Philippine Statistics Authority.
Ang pagbakuna sa mga bata nga nag-edad og 12 hangtud 17 anyos nga dunay mga sakit, kinsa nahilakip sa listahan sa A3 priority, nisugod na niadtong Biyernes, Oktubre 29, didto sa Southern Philippines Medical Center (SPMC).
Sa iyang mensahe, sa ngan ni Davao City Health Office (CHO) head Ashley Lopez ug Davao City Vaccination Cluster Head Dr. Josephine Villafuerte, nagpasalamat si Dr. Aldrich So ngadto sa mga kaabag sa siyudad sa ilang vaccination program gikan sa paglusad niini niadtong Marso ug hangtud karon, uban sa pagsugod sa bakuna sa mga kabataan.
"[We] would like to extend our heartfelt gratitude to our partners for the vaccination program since day one. I'd like to add, it's not just only momentous or historical event for SPMC but also for Davao City and the Davao Region," tataw ni So.
Sukad niadtong Oktubre 28, ang vaccination cluster sa siyudad mitala na og kinatibuk-ang 882,818 indibiduwal kinsa mga fully vaccinated na samtang 788,001 naindiksyonan na og unang dose. Punting sa siyudad nga makabakuna og 1.2 milyon sa 1.8 milyon nga populasyon una matapos ang Nobyembre.
Si Department of Health (DOH) Assistant Secretary Dr. Roy Ferrer nagsulti nga mga kabataan makadawat lang og bakuna sa gihatag nga emergency use authority (EUA) sa Philippine Food and Drug Administration (FDA) alang sa "pediatric population" nga mao ang Pfizer ug Moderna.
Gisulti sab ni DOH Davao Director Dr. Annabelle Yumang nga niadtong Oktubre 28, nakadawat na sila og interim guidelines alang sa pagbakuna sa kabataan nag-edad og 12 hangtud 17 anyos. Dugang pa niya nga ang pagbakuna alang sa tanang mga kabataan sulod sa maong mga pangedaron magsugod na ugmang adlawa, Nobyembre 3 pataas.
Sa Davao Region, punting nila nga makabakuna og kinatibuk-ang 620,216 kabataan kinsa nalakip sa nahisgutang mga edad.