NAABTAN na gyod sa legal nga pangedaron ang nadakpan nga namaligya og shabu ang 18-anyos nga lalaki nga taga Barangay 76-A, Bucana, Davao City.
Daling miporma og team ang Ecoland Police Station sa panguna sa hepe nga si Police Major Carol Jabagat human positibo nga mobaligya og ilegal nga druga ang suspek.
Ang dinakpan giila sa Ecoland PNP nga si Christian Natad Genobisa, alyas Chan Chan, 18-anyos, taga Bucana ning siyudad.
Mga pakite sa gituohang shabu nga dunay street value nga P5,500, marked money ug cellphone ang nakuha gikan sa posisyon sa dinakpan.
Sumala sa kapulisan nga niadtong menor de edad pa ang suspek duna na kini ilegal nga aktibidad, apan karon lamang nasapnan dihang legal na ang pangedaron nga puwede nang makasohan.
Nagtingkagol na ang suspek sud sa selda sa Ecoland PNP samtang giandam na ang posible nga kaso nga ipasaka batok kaniya didto sa korte. (Jeepy P. Compio)