DEAD on the spot ang usa ka lalaki human gipusil sa iya mismo nga kainom alas 5 sa hapon niadtong Lunes, Nobyembre 1, didto sa Purok 7, Barangay Tibuloy, Toril, Davao City.
Subay sa report sa Toril Police Station, nasayran nga ang biktima nga si Arman Sarajena Dañoso, uban sa suspek nga si Ruel Samson Dañoso, 46-anyos, nag-inom og ilimnong makahubog ug sa dihang nangahubog na, nabikil na sila sa mga init nga istorya.
Ang suspek nga paryente ra sab sa biktima daling mibunlot sa iyang armas ug namusil nga miresulta sa hinanaling kamatayon sa biktima.
Mismong ang asawa sa biktima positibo nga mitudlo sa suspek nga maoy responsable sa krimen.
Dali hinuon nga mitahan ang suspek sa kapulisan ug nakuha ang pusil nga usa ka homemade Caliber .357 magnum nga dunay buhing bala.
Sa kasamtangan, ang patay nga lawas sa biktima anaa na gihaya sa TCC Funeral Homes, Macleod, Toril, Davao City samtang giandam na ang posible nga kaso nga ipasaka batok sa suspek. (Jeepy P. Compio)