KRITIKAL karon ang kahimtang sa usa ka 13 anyos nga babaye samtang namilegro usab ang bukog sa usa sa mga tiil sa 16 anyos nga babaye human sila maligsi sa usa ka van sa alas 7 sa gabii sa Lunes, Nobiyembre 1, 2021 sa ilang pagtabok sa V.Rama Avenue sa Barangay Calamba, Siyudad sa Sugbo.
Si Police Staff Sergeant Leight Vincent Gonzalve, traffic investigator sa Sawang Calero Police Station, niila sa mga biktima nga sila si Jeanquel Reign Baguio, 13, ug Jessica Angel Bedolido, 16, pulos mga lumolupyo sa A.Lopez, Barangay Calamba, Siyudad sa Sugbo.
Matod ni Gonzalve nga si Baguio dunay dugo nga migawas sa ilong ug gitoohang dunay dugo nga nipundo sa iyang ulo hinungdan nga ipa ubos sa CT scan.
Samtang Bedolido obserbahanan pa ang usa sa mga tiil human dunay nabali nga bukog, nunot na sa kakusog sa pagkabangga ug pagkalabay sa duha.
Ang drayber sa puti nga van nga si Danilo Toledo, 58,anaa sa Sawang Calero Police Station gitanggong.
Depensa ni Toledo nga wala niya mabantayi ang duha nga milabang sa dalan tungod kay nasulawan siya sa suga sa sakyanan nga iyang kasugat.
Ang van nga gimaneho ni Toledo iya sa Horizon Transport and Tours nga anaa nahimutang sa dakbayan sa Talisay.
Samtang si Apple Arnaiz, kauban sa duha ka mga biktima nga nabanggaan, naluwas sa hitabo tungod kay wala maabti sa dulong sa van.
Matod pa ni Arnaiz nga iyang nabantayan nga kusog ang dagan ni Toledo apan didto nalang niini namatikdan nga nangalagpot na ang iyang duha ka mga kauban dihang nawala na sa iyang tupad.
Dugang ni Arnaiz nga duna silay kuhaon unta nga t-shirt sa atbang nga habig sa karsada.
GIPRISO
Drayber sa motorsiklo nga nabanggaan sa laing motor gipriso kay walay lisensiya samtang ang drayber sa motorsiklo nga maoy nakabangga niya anaa nalandig sa tambalanan.
Matod ni Police Senior Master Sergeant Clint Almencion sa Mambaling Police Station 11 nga gipriso si Alvin Gonzales, 22, taga Barangay Suba, Siyudad sa Sugbo.
Samtang ana-a pa sa tambalanan si Juaner Alegado, 30, taga Barangay Dumlog sa dakbayan sa Talisay.
Matod ni Almencion nga si Gonzales gidakop tungod sa pagmaneho nga walay lisensiya ug wa mag-amping sa pagmaneho sa motorsiklo. Samtang nag drive nisuway og sibat human sa hitabo. (BBT)