Barrita: Nuisance candidates P100K ang multa?

Barrita: Nuisance candidates  P100K ang multa?

MIABOT og 47,853 ka mga tawo ang misang-at og certificates of candidacy (COCs) ug certificates of nomination and acceptance (CONAs) alang sa 2022 elections atol sa walo ka adlaw nga gigahin sa pag-file sa mga COCs gikan sa Oktubre 1 ngadto sa 8, 2021.

Alang sa national positions, 97 ang nikandidato sa pagkapresidente, 29 para sa bise presidente, 176 alang sa 12 ka senatorial seats ug 270 ka party-list groups alang sa 63 ka party-list seats sa House of Representatives.

Sa local positions, 733 ang magtigi sa alang sa pagkakongresista sa 253 ka mga distrito sa House of Representatives. Samtang 281 ang midagan sa pagkagobernador sa 81 ka lalawigan, 226 para sa 81 ka bise gobernador ug 1,951 alang sa 782 ka provincial board members.

Sa mga syudad ug kalungsoran, adunay 4,486 ka kandidato alang sa 1,634 ka mayor, 3,968 sa 1,634 ka bise mayor ug 35,636 alang sa 13,558 ka mga konsehal.

Apan hashasan pa sa Law Department sa Commission on Elections (Comelec) ang listahan sa mga kandidato pinaagi sa pagtangtang sa gitawag nga nuisance candidates. Unsa man kining mga nuisance candidates?

Ubos sa Sec. 69, Omnibus Election Code, matawag ang usa ka kandidato nga nuisance candidate kon ang iyang pagdagan gihimo aron pagbiay-biay sa proseso sa eleksyon, paghimog kalibog sa mga botante kay ang iyang ngan sama sa ubang kandidato ug wa siyay tinarong nga tuyo sa pagdagan.

Aron mapugngan ang pagdagsang sa mga nuisance candidates matag eleksyon, ang Comelec niawhag sa Senado nga ipasar ang balaudnon nga magpahamtang og multa nga P100,000 sa mapamatud-an nga usa ka nuisance candidate ug diskwalipikado siya nga mokandidato sa duha ka magsunod nga piniliay.

Way kontra

Apan klarong di matawag nga nuisance candidate kadtong mga kandidato nga way kaatbang sama sa labing menos napulo ka kandidato dinhi sa Sugbo. Gani, usa ka boto da ang gikinahanglan aron ideklarar sila nga mananaog.

Naglakip kini nila ni Boljoon mayoral candidate Jojie Navarro Derama ug reelectionist Vice Mayor Ervin Villanueva, Ronda mayoral candidate Terence Mariano Yap Blanco ug vice mayoral candidate Rocky Gabatan, Mariano Laude sa pagkabise mayor sa Sibonga, Neil Tracy Plando pagkabise mayor sa Alcoy, reelectonist Vice Mayor Raisa Go Moreno sa Aloguinsan ug reelectionist Vice Mayor Juan Alfonso Lim sa Medellin.

Si incumbent Congresswoman Emmarie Ouano-Dizon sa Cebu sixth district way kaatbang sa lone congressional district of Mandaue, sama ni Talisay City Mayor Gerald Anthony “Samsam” Gullas Jr. nga way kontra sa congressional seat sa Cebu First District. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph