DUNAY usa ka gobernador nga giprito sa batikos tungod sa kinaiya niini nga hilabihan ra kaayo nga manapi sa suppliers sa Kapitolyo.
Tiaw bay tanang suppliers sa kapitolyo, ma-gamay man o ma-dako, parehas og pangayo nga tongpats, 30 porsiyento ang pangayo, flat rate.
Matod pa, take it or leave it.
Kon dawaton nimo ang offer, segurado nga ikaw makakuha sa kontrata, pero dunay paagi nga siniguro ang gobernador.
Mangayo siya og 30 porsiyento plus kuhaon niya ang tibuok kantidad inig release na sa Notice of Award.
Dunay ubang suppliers nga misulay og hangyo pero no dice.
Way hangyoay kay mao gyod kuno na ang patakaran sa Kapitolyo.
Matod pa sa usa ka supplier nga atong nahinabi, bisan ultimo nga supply og ballpen ug papel, di gani kaabot og 50,000 ang total nga kantidad, patong gihapon ang gobernador og 30%.
Grabe ang pangurakot aning gobernador, mao kini ang naglanog-lanog nga reklamo sa Kapitolyo.
Nganong hilabihan man ang pang-warta ni Gov nga mora mag wa nay ugma, nangutana ang usa ka supplier nga naglibog.
Ay sus, munamona gyod intawon nga pangurakot anang gobernador kay doblehon kuno niya iyang paningkamot nga modaog gyod sa piniliay.
Pabahaan gyod kuno niya og kwarta ang mga tawo aron pagseguro nga modaog siya.
Susmariyosep, unsa na may mahitabo sa maong probinsiya kon mao nang tawhana ang modaog puhon, simbako lang.
Sagdi na lang nang mga suppliers kay negosyo man nang ila, matod pa sa usa ka empleyado.
Ang nakapait gyod ang among suweldo, matod sa empleyado.
Ang among sweldo naandan na nga ipaagi sa ATM, buot ipasabot, deretso nga madawat namo among sweldo.
Apan karon, giusab ni gob. Dili na ATM kondili ipaagi na sa tseke. Unya si Gob mismo ang mohatag sa tseke dayon pakuha og picture.
Dako ang kalangan sa maong paagi. Ang nakapait pa gyod kay di mosugot og ipanghatag ang mga tseke sa mga empleyado kon wala siya.
Grabehas pamolitika sa gobernador, matod sa kawani.
Adunay buot ipasabot niini, dugang sa empleyado.
Unsa man?
Mismo ang mga trabahante sa Kapitolyo nangandoy na og kausaban sa pamunoan karon. Gusto nila nga bag-ohon na ang namunoan.
Apan ang gobernador nakabantay niini. Mao kini hinungdan nga bisan iyang mga sakop sa Kapitolyo, kinahanglan pa nga iyang kampanyahan aron lang siya makadaog.