PASAKAAN og kasong kalapasan sa Republic Act 10591 o Illegal Possession of Firearms ang duha ka mga suspek nga giingong mga gunrunner human madakpi alas 7 sa gabii, Martes, Nobiyembre 2, 2021.
Giila ang mga suspek nga sila Adji Mohaimen Akmad Lumamba ug Talib Basagan Manindig, mga nadgpuyo sa Matanog, Maguindanao Province.
Gibutyag ni Maguindanao Provincial Police Office Director Colonel Jibin Bongcayao nga nadakpan sa hiniusang puwersa sa Shariff Aguak Municipal Police Station, 1404th Regional Mobile Force Company, Regional Mobile Force Battalion 14 ug Regional Intelligence Division-Regional Special Operation Group sa Police Regional Office-Bangsamoro Autonomous Region ang mga suspek sa gilusad nga entrapment operation didto sa Sitio Malinis, Barangay Mother Poblacion, Shariff Aguak.
Narekober gikan sa posisyon sa mga suspek ang usa ka Remington 5.56 rifle, usa ka 40-millimeter grenade launcher, cellphones ug buy-bust money.
Ang duruha giingong nalambigit sa ilegal nga pagpamaligyag armas sa Cotabato City ug Maguindanao Province.
Sumala pa nga dugay na nga gipanid-an sa mga awtoridad ang kalihukan sa duruha nga giingong pabalhin-balhin og tagoanan.
Samtang gidayeg ni Police Regional Office-Bangsamoro Autonomous Region Regional Director Brigadier General Eden Ugale ang operating troops nga nakadakop sa mga suspek.
Balhog na mga suspek sa prisohan sa Shariff Aguak Municipal Police Station ug pasakaan og tukmang kasong.