GIKUSTODIYA na sa Tagum City Police Station ang usa ka sundalo human nag-amok nga miresulta sa pagkamatay sa duha niini ka kaubanan ug gikaangol sa laing usa.
Ang insidente nahitabo alas 8 sa gabii niadtong Martes, Nobiyembre 2, 2021, didto sa kampo sa CMO Battalion sa Barangay San Agustin, Tagum City.
Subay sa report gikan sa Tagum City police, ang suspek mao si Staff Sergeant Arvin Bureros, kinsa pasakaan og kaso Huwebes sa duha ka ihap sa kasong murder ug attempted murder.
"Giandam na namo ang pagpasaka og kaso batok sa suspek kinsa naa karon sa among custody diri sa Tagum PNP," ingon ni Police Staff Sergeant Virgilio Buhat Jr., ang imbestigador sa kaso.
Nasayran nga gipangrapido sa suspek gamit ang gituohang 5.56 rifle nga armas ang tulo ka biktima nga sila Major Franklyn Embat, Philippine Army (PA), kinsa dead on arrival sa Tagum Doctors Hospital; Technical Sergeant Sandato Tomas, PA, kinsa dead on arrival sab sa Davao Regional Medical Center sa Tagum; samtang ang usa mao si Major Minehart Maliaoao, PA, kinsa luwas na karon sa makuyaw nga kahimtang sud sa Mission Hospital.
Sumala sa report una ang pagrapido namulong pa ang suspek og: "Tapusin na natin ito para matapos na," dayon sunod-sunod ang buto sa armas.
Human sa hitabo, dali nga gipangdala sa ospital ang mga biktima sa ilang kaubanan ug gilayong mitahan ang suspek sa awtoridad dala ang iyang isyu nga armas nga usa ka Glock 17.
Nakuha sa crime scene ang 20 ka basiyo sa bala sa caliber 5.56 rifle nga maoy gigamit sa sundalo sa pagrapido sa iyang mga kaubanan.
Wa na gidetalye pa sa awtoridad ang hinungdan sa krimen sanglit nagpadayon pa ang ilang gihimong imbestigasyon sa kaso.