Nasayud ba mo nga sa kadaghang housemates nga nagkauyab sukad gibuksan ang Pinoy Big Brother house niadtong Agusto 21, 2005 maihap ra gyud ang nagkadayon ug nilungtad? Unsa kahay sikreto sa malungtaron ug malampuson nilang relasyon? Ilailaha sila sa atong Ssssuper Ka!
“GEE-MICK”
Sila ang pinakadugay nga PBB couple nga hangtod karon wa gyud magbuwag. Si Gee-Ann Abrahan ug Mickey Perz ang loveteam nga sikat niadto sa tawag nga “GeeMick.”
Ang ilang lovestory nagsugod dihang nagkauban sila isip housemates sa Pinoy Big Brother Season 2 niadtong 2007.
Nakasal sila sa Santuario de San Antonio Parish sa Forbes Park, Makati niadtong Enero 4, 2016 human sa halos walo katuig nilang panag-uyab.
Sa interview sa ABS-CBN News, niangkon si Gee-Ann nga dili lalim ang ilang giagian ni Mickey apan love gyud nila ang usa’g usa.
Duha na ang ilang anak nga silang Raphaelle Mosehla, 3 anyos ug River Indigo nga natawo niadto lang Mayo.
Ang dancer-choreographer nga si Mickey ang runner-up ni Bea Saw nga maoy gideklarar nga Big Winner sa mao nga season.
“MELASON”
Usa usab sa nitatak sa PBB fans ang lovestory nilang Melai Cantiveros ug Jason Francisco o sikat sa pangan nga “MelaSon” sa 7th season sa Pinoy Big Brother: Double Up nga nidagan gikan Oktubre 2009 hangtod Pebrero 2010.
Tulo ka buwan human gianunsyo ni Melai nga buntis na siya sa una nilang liwat, gikasal sila sa General Santos city nga mao iyang hometown niadtong December 9, 2013.
Sama sa ubang magtiayon nakasinati usab sila og mga pagsuway nga nisangpot sa break-up niadtong 2016. Apan ilang gipamatud-an nga mas bililhon ang mga gipanumpaan nila sa altar kaysa ilang garbo.
Sila pa gihapon hangtod karon uban sa ilang mga matahum nga anghel nga silang Amelia Lucille, 7 anyos, ug Stela Rosalind, 4.
“CANDY”
Sila ang ikatulong PBB couple nga wa say paglubad ang relasyon.
Sila ang loveteam nga gitawag og “CaNdy” nga kumbinasyon usab sa ilang mga pangan.
Silang Carlo Romero ug Wendy Tabusalla parehong housemates sa Pinoy Big Brother: Unlimited niadtong Oktubre 2011 diin ang nidaug ang Cebuanong si Slater Young.
Si Carlo ug Wendy nakasal sa civil niadtong Agusto 8, 2014 sa Chicago nga maoy hometown ni Romero. Sa pagkakaron tulo na ang ilang mga chikiting nga silang Carson, Carter, ug Charlotte.
Ang sikreto nila sa malampusong kaminyuon, “is to keep a happy family.”
“MCLISSE”
Silang McCoy de Leon ug Elisse Joson o “McLisse” ang pinakauwahing PBB couple nga nagbunga usab og anak ang pagminahalay.
Apan niadto lang ning Oktubre 31 nila gibutyag ang ilang sikreto nga nabuntis diay siya sa miaging tuig ni Mccoy pila ka buwan lang human sila nagbalik gikan sa halos duha katuig nilang break-up.
Ang duha unang nagkarelasyon sa Pinoy Big Brother Lucky 7 edition niadtong 2016.
Sayo pa hinuon kaayo isulti kon sila na ba gyud ang magkadayon apan manghinaot ta nga sama sa “GeeMick,” “CaNdy” ug “MelaSon” molungtad usab ang “McLisse.”