ALAS dos sa hapon. Samtang nanglaba si Perla sa luyo sa balay sa iyang kapuyo nga si Abner, miduol niya ang ilang silingan nga abogado. “Perl, wala pa moy plano ni Abner nga magpakasal?” ni Atty. Rudy Gabucan. Abogado ang bana ni Alice, maguwang ni Gina, inahan ni Abner. Nahibulong si Perla kay karon pa mahitabo nga mitagad niya si Rudy. Si Alice ra ang motingog niya. Unom ka tuig na si Marlene, ang anak nilang Abner. Nagtuo si Perla nga sama sa inahan ni Abner, si Rudy dili kadawat niya nga mahimong asawa ni Abner.
“Wa man gyuy hisgot si Abner,” ni Perla sa matinahuron nga tuno.
“Naa koy gihimo nga kasabutan sa gugma. Akong papirmahan ninyong Abner aron makahunahuna siya nga magpakasal mo,” ni Rudy.
Wa si Perla magdahom niini. Misamot iyang katingala. “Hain man na, Sir, aw, Attorney?”
“Ayaw na lang pag-sir o attorney nako. Tiyo na lang. Ako sang kuhaon ang kasulatan, kadiyot,” ni Rudy nga daling misulod sa pultahan sa ilang balay. Nahibalik si Rudy nga nagbitbit og papel. “Ipakita ni kang Abner, unya pahibaw-a ko kon naa ba siyay gustong usbon una siya mopirma,” ni Rudy nga nagtunol sa papel ngadtong Perla.
“Salamat,” ni Perla nga naulaw pang mosampit og “tiyo”.
“Way sapayan,” ni Rudy.
“Nganong nausab man imong hunahuna?” ni Perla. “Sa una morag di man ka kadawat nako. Unya karon, gusto na man ka magpakasal mi ni Abner?”
“Para sa inyong anak. Aron dili ma-illegitimate. Gusto sab nakong kombinsihon si Gina nga ipakasal na mo,” ni Rudy nga nagpahiyom. “Hain man diay si Abner?”
Nagduwag tennis,” ni Perla.
“Ipabasa lang unya na niya inig uli,” ni Rudy dayong sulod sa ilang balay.
Dili kasupak si Abner sa iyang mama kay wa siyay trabaho. Suportado siya sa inahan nga biyuda na. Nagtrabaho si Gina isip domestic helper sa Amerika ug siya ang nagbuhi sa pamilya sa iyang anak nga nagpuyo sa bunggalo ni Gina luyo sa munisipyo sa Amiraw.
“NGANONG interesado man ka, Tiyo, nga magpakasal mi ni Perla?” ni Abner.
“Para sa inyong anak. Aron di magpabiling illegitimate si Marlene. Ug aron sab di mo magpabiling mansebado,” ni Rudy.
“Unya, mosupak man gyud si Mama. Iya man ganing pahinginlan si Perla!”
“Pirmahi lang ang kasabutan. Ako ray mokombinsi ni mama nimo. Padalhan nako siyag kopya sa kasabutan,” ni Rudy.
“OK, Tiyo.. Pirmahan namo,” ni Abner dayong gawas ug mibalik sa iyang balay.
Pagbalik ni Abner sa ilang Rudy nagdala na siya sa kasabutan nga pinirmahan na.
“Masayod ra unya ka unsay pulong ni mama nimo,” ni Rudy humag dawat sa papel.
Paglabay sa usa ka bulan nakadawat si Aber og teks sa iyang selpon gikan sa iyang mama Gina. Nagkanayon ang teks,”Pakasal mo sa Pebrero l4, 2022. Akoy abaga sa gastohan. Di lang ko motambong, kay ang akong iplete sa ayroplano idugang na lang sa inyong puhonan kon mag-negusyo mo.” Naniga ang mga mata ni Abner sa kalipay. Gipabasa dayon niya si Perla.
May dugang teks, “Magpasalamat mo sa inyong Tiyo Rudy. Tungod sa inyong kasabutan sa gugma nga hinimo niya, natandog akong kasingkasing.”
Ilang gibasa og balik ang kopya nila sa kasabutan. Nag-ingon ang mga kondisyon: Magminahalay ug magsuportahay kami hangtod nga buwagon kami sa kamatayon; magtampohay mi sa among kita alang sa kapiskay namo ug mangandoy sa tanang kaayohan; lipayon namo ang usag usa ug dili mohimo og kalihukan o mobungat og pulong makapasakit sa balatian sa usag usa; mag-ampo sa Diyos ug magbuhat lang og butang nga makapahimuot Kaniya; tudloan namo sa maayong pamatasan among mga anak, ug magpakitag gugma sa Diyos ug sa isigka tawo; respetohan namo kining kasabutan sa gugma sa pagka matinud-anon sa usag usa hangtod sa among katapusang ginhawa.
Tugob sa kalipay nga nag-apir sila si Perla ug Abner.
(KATAPUSAN)