GIMANDUAN ni Presidente Rodrigo Duterte ang Department of the Interior and Local Government (DILG) sa Miyerkules, Nobiyembre 3, nga silotan ang mga chief executive sa local government unit (LGU) nga mapakyas sa paggamit sa doses sa bakuna sa coronavirus disease (Covid-19) nga gihatag kanila sa labing paspas nga paagi.
Atol sa iyang Talk to the People Address, si Duterte niingon nga nakakita sila og “fault lines” sa kinatibuk-ang pagpamakuna ug wala siya nakontento sa rollout.
“I will hold each and every LGU accountable for this...Hindi ko malaman saan nagkakamali bakit mahina ang paglabas ng bakuna. Dito sa NCR (National Capital Region) medyo okay. Sa regional level doon nagkakaroon ng medyo problema,” matod ni Duterte.
“Noon walang bakuna, ngayon ‘yung bakuna nandiyan na. Medyo hindi ako... medyo nakuntento to the sense I have reiterated my instruction to agencies to make sure that local government units will receive their daily jab performance so that our country can reach the target of one million jabs or more every day,” siya nidugang.
Gisubli usab ni Duterte ang iyang kamandoan alang sa hepe sa National Task Force Against Covid-19 nga si Carlito Galvez Jr., ingon man sa kapulisan ug militar, nga ihatag ang tanang gikinahanglang suporta alang sa mga LGU, partikular na sa paghatod sa mga bakuna ug pagpalihok sa mga kahinguhaan.
“Sabi ko gamitin ang mga air assets ng PNP (Philippine National Police), AFP (Armed Forces of the Philippines) pagdating sa pag-deliver,” matod niya.
Giila ni Galvez ang problema sa logistics, distribution ug mobilization partikular na sa municipal ug barangay level, apan matod niya gitubag na kini.
“Hinihimok natin ang mga LGU na palakasin ang kanilang capacity para magkaroon ng higher capacity on doing the jab per day and at the same time, they procure their own cold chain system para makapag-imbak sila ng kanilang mga bakuna,” siya nidugang.
Matod ni Galvez nga sa pagkakaron, adunay 49 milyones nga vaccine doses sa stockpile.
Sa sayo pa, ang PNP ug AFP nag-deploy sa pipila sa ilang medical reserved forces aron motabang sa vaccination drive.
Ang assets sa hangin ug dagat sa maong mga ahensya gigamit usab sa paghatod sa mga bakuna.
Nag-apil usab ang kapulisan ug militar sa ilang reserved nga pwersa aron masiguro ang paghatud sa mga bakuna sa mga lugar nga bakunahanan.
Gimanduan usab ni PNP Chief Guillermo Eleazar ang mga police unit nga pahimuslan ang gahom sa social media sa pag-edukar sa publiko bahin sa mga benepisyo sa mga bakuna ug pagdasig kanila sa pagpabakuna.
Matod ni Duterte nga target sa gobyerno ang pagbakuna og usa ka milyon matag adlaw.
Matod ni Galvez nga sugod niadtong Nobiyembre 20, ilang gitinguha nga makab-ot ang 1 ngadto sa 1.5 milyones ka bakuna matag adlaw. (TPM sa SunStar Philippines)