Rama pabor libkason na ang curfew
PABOR si Acting Mayor Michael Rama nga libkason ang curfew kon maseguro nga kontrolado na ang hulga sa coronavirus disease (Covid-19) aron hinayhinay maplastar ang bag-ong normal ug mabalik ang paspas nga pagtuyok sa ekonomiya sa dakbayan.
Mao kini ang pamahayag ni Rama kagahapon, Nobiyembre 3, human nasayod nga libkason na ang curfew sa Metro Manila nga gilangkoban sa 17 ka local government units (LGUs) sugod karong adlawa, Nobiyembre 4.
“We will discuss it from the convergence point of views if and when we are ready, then why not?,” saysay ni Rama sa Superbalita Cebu.
Ang acting mayor nagkanayon nga iya unang kuhaon ang habig sa mga opisyal sa Emergency Operations Center (EOC) ug Philippine National Police (PNP) sa dili pa siya mohimo og hukom.
Sa kasamtangan, ang Cebu City sama sa mga siyudad sa Metro Manila, padayon nga nitibugsok ang kaso sa Covid-19 ug nikunhod usab ang critical care utilization rate sa mga tambalanan alang sa symptomatic Covid-19 patients.
Ang acting mayor wala pa hinuon nipahibawo kon kanus-a siya mopatawag og convergence meeting nga tambungan sa lainlaing sektor apil na ang Chamber of Commerce nga maoy nagtimon sa ekonomiya.
Sukad niabot ang Covid-19, ang Cebu City nipatuman og curfew gikan alas 8:00 sa gabii panahon sa enhanced community quarantine (ECQ) ug nahimong alas 10:00 sa gabii panahon sa modified general community quarantine (MGCQ)ug nahimong alas 11:30 sa gabii hangtod alas 4:00 sa kaadlawon ning panahon sa alert level number 2.
Ug nunot sa taho sa paglibkas sa curfew sa Metro Manila, ang opisyal sa Cebu City Police Ofice (CCPO) niluwat og pamahayag nga dili pa morekomendar karon sa paglibkas sa curfew bisan sa pag-ubos pag-ayo sa kaso sa Covid-19.
Si Police Lieutenant Colonel Wilbert Parilla, deputy city director for operations sa CCPO, nagkanayon nga dakog natampo ang curfew sa pag-ubos sa kaso sa Covid.
Nakatampo usab kini sa pag-ubos sa crime volume sa dakbayan sa nanglabay nga mga buwan tungod kay sayo naman mamauli ang mga tawo.
“For our part mas mo- prefer ta kanang naa lang gyud gihapon tay curfew," matod ni Parilla.
Gihimong modelo ang kapulisan sa siyudad sa Sugbo sa Camp Crame diin gipa sunod ang tanang best practices nga ilang gihimo sa tanang Police Regional Office (PRO) sa tibuok nasud.
Matod ni Police Colonel Roderick Minong, deputy regional director for operations sa PRO 7, ang mga dagkong siyudad sa kaulohan ug sa Mindanao misaka ang kaso sa Covid apan ang dakbayan sa Sugbo padayon nga nagkaubos.
Apan miklaro si Parilla nga igo lang sila nga mosugyot ngadto sa EOC ug kon ipatuman gyud sa kagamhanan nga wagtangon na ang curfew, wala silay mahimo gawas sa pagtuman niini.