PADAYON ang pagnaog sa ihap sa mga bag-ong kaso sa Covid-19 sa Cagayan de Oro human kini mitala og 13 kaso, matud sa report sa City Health Office Miyerkules, Nobyembre 3, 2021.
Matud sa City Health Office, sa 13 ka mga bag-ong kaso, upat ang mga local index nga mga kaso, unom ang mga local cases with link, usa ang lokal nga authorized persons outside residence (Apor), usa ang Apor with link, ug usa ang patay.
Ang Cagayan de Oro adunay 509 ka mga active cases, 94 niini na-admit sa Northern Mindanao Medical Center ug uban pang mga ospital sa syudad, 414 ang mga outpatients, ug usa ang ROF/LSI.
Nakatala usab og 37 recoveries. Anaa na karon sa 18,854 ang ihap sa mga nakarekober sa dakbayan.
Ang ihap sa mga namatay sa Covid-19 sa syudad anaa na sa 838.