NAGHINUKTOK sud sa selda sa Talomo Police Station ang usa ka 26-anyos nga lalaki human nasikop sa kapulisan dihang nasayran nga peke diay nga miyembro sa Task Force Davao.
Sa report sa Talomo police, nasikop ang suspek nga si Emma Alfredo Lapura, construction worker ug residente sa Malita, Davao Occidental, kinsa nadakpan atol sa operasyon sa kapulisan sa Talomo alas 11:15 sa buntag, Nobyembre 3, didto sa Bypass Road, Ulas, Davao City.
Nasayran nga gipara ang suspek sa mga pulis ug gipangitaan og driver's license apan wala kini napakita, hinuon nagpakita siya og identification sa militar apan nakapatahap na hinuon sa mga pulis kay wala kini logo hinungdan nga gikustodiya kini.
Nasayran sab nga ang gimaneho niini nga motorsiklo, kinarnap. Nakuhaan sab siya og usa ka plastic replica pellet gun sa Caliber .45 pistol; ang peke nga Armed Forces of the Philippines identification card, full military uniforms ug combat boots, city citation ticket, ug ang photocopy sa OR/CR.
"Later at this office, it was found out that his driven motorcycle was a carnapped vehicle after his victim appeared at this office and pinpointed the suspect as the one who deceived him and took away his motorcyle," sumala ni Police Major Sean Logronio ang hepe sa Talomo police.
Kasong kalapasan sa Artikulo 171, 177 ug 179 sa Revised Penal Code ug Republic Act (RA) 4136, 10883 ug 10591 Section 3 (q) ang atubangong mga kaso sa suspek.
"May this serve as a warning to all who will unauthorizedly wear military uniforms and use them to evade police operations such as our checkpoints and deceive other people so that they can carry out their illegal activities, I assure you that you will be arrested and charged," sumpay ni Major Logonio.