HUMAN gibatikos ang "No Vaccine, No Transaction Policy" ni Cabantian, Davao City Barangay Kapitan Nilo Cabiles, nagbutang na lang siya og designated transaction area sa gawas alang sa mga kliyente nga dili pa bakunado batok Covid-19.
Huwebes, Nobiyembre 4, 2021, sa ilang Facebook page sa Barangay Cabantian, gipahibalo nga gibakwi na ni Cabiles ang gimugna niini nga palisiya sa "No Vaccine, No Transaction Policy" human giayog batikos sa mga netizens ug sa ilang mga molupyo sa barangay.
Inay nga "No Vaccine, No Transaction Policy" magpatuman na lamang kini og "No vaccine, No Entry Policy" sa ilang barangay hall.
Sa Facebook page sa barangay, nangayo og dispensa si Cabiles ug matud niya gibawi na niya ang maong palisiya.
"Ako po ay taos-pusong humihingi ng paumanhin sa aking naging desisyon at akin po itong binabawi. Ito po ay sa kagustuhan kong mapangalagaan at maproteksyunan ang karamihan sa ating mga ka-barangay. Kung pagkakamali man ito, lubos akong humihingi ng paumanhin sa mga naapektuhan," sumala ni Cabiles sa maong post.
Niya pa nga padayon nga moalagad ug mag-atiman ang Barangay Cabantian ngadto sa mga nanginahanglan sa ilang serbisyo sa ilang mga lumulopyo.
Mihangyo sab si Cabiles sa mga taga Cabantian nga magpabakuna na kontra Covid-19 aron luwas ang kaugalingon ug ang ilang tagsa-tagsa ka mga pamilya.