Nalzaro: Mayor Edlab survivor; dili mo-resign

Nalzaro: Mayor Edlab survivor; dili mo-resign

HUMAN sa pagpakahilom, giklaro na sa pamilya ni Cebu City Mayor Edgardo Labella ang estado sa panglawas sa mayor ug balatian nga gihambin nga hinungdan sa kanunay nga pagsulod-gawas sa tambalanan. Dili diay ang giingon nga prostate cancer nga gihambin sa mayor ang hinungdan sa kanunay nga pagkasakit. Aduna tuod siyay prostate cancer apan na-control na sulod sa pipila ka katuigan. Sepsis ug pneumonia ang grabeng gihambin karon sa mayor. Sepsis maoy extreme response sa lawas sa usa ka infection nga hulga sa kinabuhi. Hapit mamatay si Labella niini.

Bisan pa sa balatian, dili gihapon siya mo-resign sa katungdanan gumikan kay daghan pa siya og plano sa dakbayan nga tapuson hangtod mapupos ang iyang termino sa Hunyo 30, 2022. Kana kon paabton pa sa Labaw’ng Makagagahum. Ang Ginuo ra maoy nasayod kon hangtod kanus-a mapupos atong kinabuhi.

Survivor si Labella. Naka-survive siya sa pagkalunod sa barko nga ilang gisakyan gikan sa kaulohan pauli sa Sugbo uban sa iyang asawa nga si Joy, pipila ka tuig na ang nakalabay. Naglutaw-lutaw siya sa kadagatan sulod sa pipila ka adlaw nga way makaon ug mainom sa wala pa siya mabangali o ma-rescue. Kon iyang nalabang ang situwasyon, walay rason nga dili niya malampasan usab ning nahitabo karon, inubanan sa pag-ampo ug bendisyon sa Labaw’ng Makagagahum.

Gumikan sa dili niya pag-resign, daghan ang nanaway kaniya. Nganong dili man siya mopahuway ug hatagan og pagtagad ang iyang panglawas aron siya maka-recover. Well, dili kita makasimba ug makakalawat kon unsa ang anaa sa huna-huna ug kasingkasing sa mayor. Pagkakaron, dili pa siguro angay nga ato siyang pugson sa pagdemiter. Kana kon okey ug makaya pa niya. Basin maka-recover. Unya ra kita manawagan o mo-pressure kang Labella ug sa iyang pamilya kon ato nang mahibaw-an nga dili na makaya sa iyang panglawas labi pa kon maapektuhan na ang iyang pangisip. Kana bang dili na siya maka-desisyon gumikan kay comatose na ug dili na maka-function og maayo.

Mintras wala pa moabot kini nga stage, ato siyang hatagan og ‘benefit of the doubt.’ Hinunua, ato siyang iampo nga mabaskog og balik. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph