DAGHAN nang brand sa bakuna ang nangabut sa Pilipinas nga gidapat na sa katawhan. Ang maong mga bakuna dili pa mapalit sa mga botika kay ang gihatag sa Food and Drug Administration (FDA) mao ang emergency use authorization (EUA) lamang. Labing daghang brand mao ang Sinovac vaccine nga gikan sa China. Nag-una ang donasyon sa maong nasud mao nga kadaghanan sa mga Pilipino Sinovac ang nabakuna. Ang mga healthcare workers (HCWs) gi-una sugod sa mga buwan sa Marso ug Abril, karong tuiga.
Si Rontgene Solante, sakop sa Vaccine Expert Panel (VEP), miduso na usab nga kinahanglan nang hatagan sa third dose kun booster shot ang mga HCWs. Suma ni Solante nga sugod niadtong Agusto ug Septiyembre duna nay bakunadong mga HCWs nga nataptan og mild ug moderate COVID-19. Gituhoan nga muminos ang epekto sa Sinovac vaccine gikan sa unom ngadto sa walo ka buwan human sa pagbakuna.
Maayo tingaling ipahibawo usab nila kon kanus-a ang booster sa mga naturokan og AstraZeneca, Pfizer ug ubang bakuna. Angay masayran nga kon muhopas na ang epekto sa maong mga bakuna sama ra sa wala ka mabakunahi.
Kadudahan na man kaayo kining mga public opinion survey nga gihimo sa ubang mga survey companies gawas sa Social Weather Stations (SWS) ug Pulse Asia. Naghimo og independent and non-commissioned survey ang Publicus Asia, Inc. niadtong Oktubre 11 – 18, 2021 sa 1,500 ka mga respondents samtang ang RP – Mission Development Foundation, Inc. adunay gihimo nga face to face survey niadtong Oktubre 17 – 26 uban sa 10,000 ka respondents.
Ang mosunod maoy resulta sa Publicus; Bongbong Marcos – 49.3, Leni Robredo – 21.3, Isko Moreno – 8.8, Ping Lacson – 2.9, Manny Pacquiao – 2.8 ug Bato dela Rosa – 1.9. Sa Bise Presidente; Bong Go – 23.6, Willy Ong – 19, Tito Sotto – 17.3, ug Kiko Pangilinan – 12.3.
Sa RP – Mission Development Foundation, Inc. mao kini ang resulta; Isko Moreno – 25.38, Bongbong Marcos – 23.10, Leni Robredo – 18.31, Manny Pacquiao – 17.88, Ping Lacson – 7.08, ug Bato dela Rosa – 3.41. Sa Bise Presidente; Inday Sara – 33.11, Tito Sotto – 26.87, Bong Go – 14.92, Kiko Pangilinan – 11.13, Willy Ong – 8.94 ug Lito Atienza – 2.15.
Hain man niining duha ka public opinion survey ang inyong tuho-an, kon aduna man? (mannyrabacal1144@gmail.com)