BUSOG ka na, lingaw ka pa sa imong pagsuroy-suroy kon mosampak ka sa Makan 5 nga nahimutang sa Wiggy’s Beach Resort, Barangay Jubay, Lungsod sa Lilo-an, Sugbo.
Ang maong establisemento gipanag-iya ni Marc Cuizon inabagan sa iyang kapikas nga si Abegail Soroño nga gibuksan niadtong Marso 2021 taliwala sa pandemiya.
Ang magtiayon mao sab ang nanag-iya sa ubang branches nga Makan kinsa na-ila sa ilang unlimited sugba sa presyo nga kaya sa bulsa sa tag-P199 matag tawo.
Matod pa ni Abegail nga sa tanang Makan branches, ang Makan 5 maoy lahi tungod kay nag-offer sila og unlimited seafood, gawas sa unlimited sugba ug unlimited drinks sa presyo nga P499 matag tawo.
Daghan sab sila og pili-anan sa pagkaon nga makatagbaw.
UNSAY NAA?
Gawas sa mga makabusog nga pagkaon sa Makan 5, naghatag sab sila og kalingawan ngadto sa ilang guest o customer kay aduna silay swimming pool sa entrance fee nga P50 alang sa mga bata ug P100 sa hamtong.
Mamahimo sab nga ipa-reserve ang pool alang sa exclusive use nga P3,000 sud sa lima ka oras.
Adunay corkage sa pagkaon nga dad-on apan aron nga way hasul sa hingtungdan, ang Makan 5 nagtanyag sab og catering.
Sa matag Sabado ug Dominggo aduna silay entertainment area nga ilang buksan sa higayon nga libkason na ang restrictions status sa Lilo-on gumikan sa Covid-19.
Anaa sab sa vicinity sa maong establisemento ang Northern Point Beach and Food Park.
Adunay kapin sa 20 ka stalls ang Northern Point nga nagtanyag og mga nagkadaiyang pagkaon ug beverages nga mahimong sawhan sa pamilya, barkada ug sa imong ka char-char.
Sa unahan nga bahin, nahimutang ang Wiggy’s Beach Resort nga mamahimong makaligo nga libre kon adunay orders sa Northern Point.
Naa say Sunrise Yoga sa beach area sa mga gustong mo-stay fit and healthy.
Samtang sa matag Dominggo gitugot ang pagdala og binuhing iro aron sab makasuroy-suroy ug makig-meet and greet sa ubang pets.
“So, mora siyag suroyanan, pagka-onan in one place dire sa Liloan,” tipik sa pamahayag ni Abegail.
HEALTH PROTOCOL
Bisan nga inanay nga nimenos ang kaso sa Covid-19, apan ang management sa Makan pabilin nga nagtamod sa pagpatuman sa minimum health protocol sa ilang guest ingon man sa ilang mga staff.
Ang matag customer nga mo-dine in sa Makan 5 mo-log alang sa contact tracing, adunay sanitation kit sama alcohol, ug ang arrangement sa ilang tables ug chair nga adunay distansiya ngadto sa laing grupo.
“Dako ra man pud ang area ma-accommodate ra sila,” pasalig ni Abegail.
Iyang gisaysay nga resulta sa pandemiya ilabi na niadtong buwan sa Hulyo ngadto na sa Agosto nga nag-struggle sa tinguha nga pabiling molutaw ang ilang negosyo taliwala sa menos nga customer.
Gihulagway ni Abegail nga ang Hulyo ug Agosto ghost month alang sa mga negosyante, gisamutan pa sa pandemiya.
Apan gumikan sa sakripisyo ug kugi nilang Marc ug Abegail pabiling mi-survive ang ilang negosyo taliwala sa mga kalisdanan resulta sa Covid outbreak.
Unsa pay inyong gipa-abot? Suroyon ta ang Makan - makanlingaw na, makanbusog pa nga dili makanbuslot sa bulsa. Ahoooy!