MGA sektor nga naapektuhan sa giproponer nga 235.8 ka ektarya nga Seafront City reclamation project sa lungsod sa Consolacion, Sugbo nangayo og tabang kang Cebu Archbishop Jose Palma.
Sa usa ka suwat nga pinetsahan og Nobiyembre 3, 2021, ang mga residente, mangingisda, motorcycle-for-hire drivers, vendors, ug shipyard workers makigtagbo kang Palma aron mangayo sa iyang giya.
Ilang gitumbok nga nanawagan na sila sa mga lokal nga opisyal nga hunongon ang reclamation project tungod kay dili lang kini hulga sa ilang panginabuhian ug sa ilang mga panimalay, kon dili lakip na sa kinaiyahan.
“We are already poor but what little livelihood we have left is being threatened by the plan of the municipal government to reclaim 235.8 hectares and turn it into what they call as Seafront City,” matod nila.
“The project, which is the centerpiece of the Alegado administration, does not only threaten our livelihood but our homes as well,” dugang nila.
Si Mayor Johannes Alegado, sa iyang State of the Town Address niadtong Oktubre 25, misaad nga itutok ang nahabilin nga walo ka buwan sa iyang administrasyon sa reclamation project.
Ang iyang inahan, Bise Mayor Teresita Alegado, kinsa modagan pagka-mayor sa 2022, nisaad usab nga ipadayon ang proyekto, nga himuon kauban ang usa ka pribadong consortium -- La Consolacion Seafront Development Corporation -- kansang mga incorporator naglakip ni Representative Victor Yap sa Tarlac ug iyang igsuon, kanhi mayor sa San Jose, Jose Yap Jr.
“With no one else to turn to, we ask on bended knees for your help and guidance. We are like sheep in need of a shepherd. We pray that you grant us an audience and hear us out,” matod sa ilang suwat.
Ilang gisultihan si Palma nga dili lang sa mga mananagat sa Tayud ang maapektuhan sa proyekto, kon dili lakip na ang mga gikan sa kasikbit nga mga dakbayan sa Lapu-Lapu ug Mandaue ingon man sa lungsod sa Liloan.
Sa usa ka pagtuon nga gihimo ni Dr. Filipina Sotto, project leader sa FBS-Environment and Community Research and Development Services, nagpakita nga labing menos 500 ka mga mangingisda gikan sa mga lungsod sa Consolacion, Liloan, ug mga dakbayan sa Mandaue ug Lapu-Lapu ang mawad-an sa ilang panginabuhian kon madayon ang proyekto.
Ang FBS usa ka think tank nga nakabase sa Sugbo nga nagtutok sa mga isyu sa kinaiyahan.
Sukwahi sa pangangkon ni Mayor nga wala nay isda sa gisugyot nga reclamation site tungod sa presensya sa mga shipyard, sa samang pagtuon nagpakita nga dili mominus sa pito ka kilo nga isda matag oras ang makuha sa mga mananagat sa maong lugar.
“This is because of the presence of rich marine resources in the waters that the municipal government wants to convert into land,” matod nila.
Base sa pagtuon, ang gisugyot nga reclamation site maoy pinuy-anan sa 75 ka matang sa corals, 51 ka matang sa macro benthic invertebrates ug pito ka matang sa bakhaw nga nursery grounds nga nagsuporta sa panagatan sa Cansaga Bay. (With PR)