ANG bulan sa Nobyembre ginasaulog nga "thanksgiving month" o bulan sa pagpasalamat, siyempre, sa atong Magbubuhat sa tanang kaayohan nga atong nahiaguman. Maayong adlaw diay mga kaigsuonan.
Musta mga ka-Super B? Did you miss me? I miss you more po. Bitaw, walay sagol nga "kacharrutan" as in gimingaw gayud ako kaninyo.
Sa nahisgutan na sa unahan, kining bulana ang thanksgiving month apan sa pagkatinuod dili na kinahanglan magpaabot sa Nobyembre aron mapasalamaton kita sa Diyos niining atong mga kinabuhi. Matag-adlaw usa ka dakung panalangin nga makapadayon kita sa atong gimbuhaton dinhi sa kalibutan busa ato gayud kining pasalamatan.
Naadmit sa ospital akong papa sulod lamang sa pipila ka semana tungod sa atay niya nga diperensiyado na (liver cirrhosis) kay lagi katorse anyos pa nahigugma sa alak ug pagpanigarilyo, miga. Karon bisan usa ka litson manok wala gayud mi nakapalit sa tibuok pension niya kay ngadto sa tambal ug pagpa-ospital ra naadto. Naprenda pa ang balay namo unya naputos pa sa utang (credit cards) tungod sa dakung galastuhon sa tambal, laboratory ug uban pa tungod sa sakit niya.
Dili na unta gani siya magpa-ospital kay lagi nauga na ang pitaka apan ako siyang nakumbinse aron padyong mabuhi kay ang mga adunahan nakong mga kaila, daghang kuwarta pagbayad sa ospital pero wala gayud nakapalit og sumpay sa ilang mga kinabuhi. Yes, datu, pero patay na.
Sigon nako sa akong amahan nga si Reynaldo Gonzales Talento, edad 65, nga bahala'g buslot na ang bulsa ug utangan pa basta BUHI pa!!! Pangitaon nato ang kuwarta kay kitaon pa na sa gamay'ng negusyo apan ang kinabuhi bisan unsang pagpaningkamot -- dili gyud mapalit kay gasa ra kini sa Ginoo, migo.
Bitaw, nag-atubang ko'g daghang krisis sa personal ug sa pamilya apan mapasalamaton nga pinaagi sa Iyang grasya, ania... nagachicka pa sa inyoha. Unta, dala sa mga pag-ampo nga kanunay kitang malaumon sa mga kaayohan sa Ginoo sa adlaw-adlaw'ng pagpanginabuhi nato. Amping ta kanunay kay dili lalim gyud magkasakit. Hapit na baya ang Pasko. Anugon kung ang atong kabanay magselebrar niini unya kita mahimo na lamang abo kay kompiyansa ra kaayo sa Covid-19 nga epekto. Bitaw, I miss you hurot! God bless.