KIDAPAWAN CITY -- Ayaw ihatag ang password sa mga nangayo pinaagi sa text, tawag o email aron dili mabiktima sa pangilad sa ATM ug credit card.
Mao kini ang tambag ngadto sa publiko ni Regional Anti-Cybercrime Unit (Racu)-Soccsksargen Investigator Police Staff Master Sergeant Edwin Arroyo.
Matud ni Arroyo nga modus operandi sa mga scammer nga magpaila nga taga bangko ug manawag sa mga biktimahon nila nga i-freeze ang ilang mga account kung dili ma-update ang ilang information.
Sugyot sa opisyal sa publiko nga kung makadawat og tawag o kaha dunay mo-email bahin niini, dili angay nga mataranta, ug i-verify dayon sa bangko.
Dugang sa opisyal nga adunay mga hotline diin mahimong tawagan ang mga bangko aron ma-verify ang nadawat nga tawag.
Giingon usab niini nga kung adunay access ang mga scammer sa mga account sa ilang mga biktima, mahimo nila kining gamiton alang sa online shopping.
Kahinumdoman nga daghan na ang nabiktima sa maong modus sa Soccsksargen nga padayon nga giimbestigahan sa mga sakop sa Racu regional office.