Binghay: Di maayo magpataka og buka sa baba

WAY sekreto nga makumkom, matod pa sa panultihon, apan pagsikat sa social media sama sa Twitter, Facebook, Instagram ug uban pa, naghinayhinay sab kini og kawala. Karon halos tanan isibya na sa kahanginan.

Kaniadtong nagtungha pa ko sa high school, ang among mga sekreto among isuwat sa nauso pa nga diary unya tipigan kini pag-ayo aron way laing makabasa. Gani ang uban butangan og lock ang mismong diary o tokador sa gibutangan ini aron di mabasahan sa uban.

Karon yano na kaayong ipang-ladlad sa mga tagtungod ang bisan unsang panghitabo sa ilang kinabuhi nga way kahadlok ug kauwaw.

Dunay mga personal nga mga sekreto nga di angay labhan atubangan sa kadaghanan.

Unsa man ni?

Matod sa Bright Side sa artikulo nga akong nabasa, kining mosunod maoy mga sekrito nga di angay ipanabi:

Una, imong mga personal nga plano sa kinabuhi, (pananglitan sunod nga biyahe, lugar nga gustong adtuan, plano pagpalit og dakong balay, mahalong sakyanan bisan ang pagkuha og examination. Unya na kini ipanabi kon nahuman na o naabot.

Sunod, ayaw ipanabi ang detalye ug personal sa imong pagkatawo. Pagpa-ubos unya kon mahimo kiputa imong baba aron di masumo.

Ayaw sab ipang-hambog imong mga binuhatan nga nakapasikat o bayani nimo kay kita tanan lain-lain og naagiang kasinatian. Mo-abot ra ang panahon nga ikaw ma premyuhan sa imong maayong binuhatan.

Ayaw pagboluntaryo o ipamugos og hatag o tambag o suhistiyon kon wa kini pangayu-a ug kinahanglana kay seguradong ipalapos ra kini sa pikas dunggan.

Ayaw hisguti ang mga kakulian sa balay o away sa banay kay kon imong huna-hunaon inig sawop sa adlaw, mobalik ra kini tanan sa hingtungdan.

Hinumdumi nga way labot ang uban sa imong kinabuhi kay wa ni sila magpakaon, magbayad sa imong tuition, tubig, kuryente o abang sa balay.

Gawas pa sab mosamot ka dako ang isyu kon naay laing mahibalo unya pun-an o kuhaan na hinuon ang estorya.

Di sab angay pataka og buka sa baba kon di mao o wa ka kasabot aron way gubot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph