GIBALIKAN sa Mactan Electric Company (MECO) ang pagbabag sa usa sa 11 ka mga sakop sa board aron makakuha og ‘provisional authority’ gikan sa Energy Regulatory Commission (ERC) alang sa bag-ong electric power supplier.
Pinaagi unta niini, gituohang mobarato ang kuryente sa Mactan island, apan ingon sa di madayon.
Ang San Miguel Consolidated Power Corporation mohatag og P3.30 matag kilowatt hour nga presyo sa kuryente.
Nipasalig usab kini nga stable ang supply sulod sa 10 ka tuig, itandi sa kasamtangang supplier nga P14 matag KwH.
Nipasabot si Engr. Gilbert Pagobo, Meco senior vice president, nga kon ang usa ka balay nagbayad og binuwan sa kuryente og P2,000, mokunhod kini ngadto sa P1,600 kon katugotan ang San Miguel isip bag-ong supplier.
Base sa record sa ERC, si Meco board member Atty. Maria Luz Caminero giingong nibabag nga makakuha og bag-ong electric power supplier.
Ang laing power supplier nga mao ang Kepco SPC giingong nitanyag og mas taas nga power rate.
“Dako namong kalibog pud nga kaayuhan man unta ni sa konsumidor, iya mang gibabagan,” matod ni Pagobo sa dihang nahinabi sa Superbalita Cebu.
Samtang si Meco admin head, Jaz Rusianan, sa iyang bahin, nagkanayon nga inisyal niyang nasayran nga si Caminero nibabag tungod kay matod pa iyang gipanalipdan ang interest sa matag konsumidor.
“Mandate sa Meco is also to protect the interest sa consumer. Kon moagi og bidding, ang pinakaubos baya ang pilion. Di unta siya (Caminero) mobabag,” pasabot ni Rusianan.
Pagkasayod ni Pagobo sa sunod-sunod nga gipahigayong husay sa ERC, gikatahong mipasangil si Caminero isip petitioner nga adunay kalapasan ang Meco sa proseso sa pagpili og bag-ong power supplier.
“Asa mang dapita nga na-violate namo? Ang mandato baya sa MECO nga pili-on ang pinaka maayo ug barato,” kuwestiyon ni Pagobo.
Sa sayo pa, ang Meco president ug chairman of the board, Douglas Lu Ym, niluwat og pamahayag pinaagi sa iyang suwat alang sa mga konsumidor nga pinitsahan niadtong Nobiyembre 2 nga nagpasabot nga adunay wa pagsinabtanay tali sa mga direktor sa kompaniya gumikan sa managlahing business interest.
Siya nagtuo nga dili unta angay ma-angin ug mag-antos ang mga konsumidor sa Meco gumikan sa maong kasungian.
“I believe that making power rates affordable is good for the people especially in this time of pandemic and this will help the economy of Mactan to recover fast,” tipik sa suwat ni Lu Ym ngadto sa mga konsumidor.
Pahibawo ni Pagobo nga sa Nobiyembre 9 adunay laing hugna sa hearing ug misaad si Caminero nga mohatag sa iyang rason sa pagbabag.
Samtang si Lapu-Lapu City Mayor Junard Chan nakatutok sab sa maong kalambuan.
Si Chan nanghinaot nga mahilot ang kasungian aron makab-ot ang kaayuhan nga makabaton og barato nga power rate alang sa mga Oponganon.
Adunay 92,499 ka mga residente sa Lapu-Lapu City nga nagsalig sa Meco ug 12,600 ka mga konsumidor sa lungsod sa Cordova.