Walo ka mga tawo, pito kanila usa ka pamilyahan samtang usa silingan, nangalanag sa isdang banak nga gipanihapon alas 7:50 sa gabii sa Biyernes, Nobiyembre 5 sa Barangay Bitoon, lungsod sa Dumanjug, Sugbo.
Nalandig sa tambalanan giila nga sila si Reynaldo Vergara, 44, amahan, mekaniko; Lucia, 41, inahan; mga anak nga sila si Kimberly, 19; Krisha, 3; Kimjie; 17, Kiarra, 11; Krister, 8; ug Teodora Lañojan, 92, silingan.
Si Police Staff Sgt. Merlo Dapar sa Dumanjug Police Station nga nahinabi sa dySS Super Radyo Cebu, nagkanayon nga ang mga biktima nakasinati sa grabing kasakit sa tiyan, nagsuka ug nangalipong.
Ang isda ilang napalit gikan sa duha ka mga fish vendor.
Si Dapar niingon nga ang mga vendor diha lang mag-display sa daplin sa dalan sa ilang baligya nga isda.
Ang mga vendor mibutyag nga ang mga isda nga banak ilang nakumpra gikan sa Pasil, dakbayan sa Sugbo.
Gibutyag nila nga ang mga isda presko kaayo, wala sila magdahom nga malanag ang mga biktima.
Si Kapitan Cheryl Cantillar sa Barangay Bitoon nga nahinabi sa Superbalita Cebu nagkanayon luwas na ang tanang mga biktima.
Sabado sa hapon naka-uli na ang ubang mga biktima human nalandig sa Barili District Hospital.
Si Cantillar nagkanayon nga si Lucia nibutyag kaniya nga gitinola sa iyang bana ang dakong banak.
Human nilag kaon, unang gisakitan sa tiyan ang anak nga lalake dayon iyang bana, dayon si Lucia.
Nangalipong sila ug naglisod sa pagginhawa samtang ang uban nagsuka.
Nangayo silag panabang sa mga silingan, nga nipainom ug gipakaon silag kamay, ingon man tuno sa lubi.
Gidali silag dala sa tambalanan, lakip ang 92 anyos nga tiguwang.
Pero nagrabihan si Kimjie hinungdan nga gi-dextrose.
Gibutyag ni Lucia nga gilimipiyuhan niyag maayo ang isda, gikuhaan sa hasang ingon man tinai.
Wala silay laing gikaon niadtong higayuna kon dili ang banak ra.
“Hasta ilang binuhing iro nalanag, naglaway kay gipakaon nila sa bukog. Gitabang sab, gipakaog daghang kamay,” dugang ni Cantillar.