“Kanita atin bulag a talatuki a ing kelang kapanupayan miparis anti king kelang kapanupayan ding bulag a pamanuki ring talasamba at manibatan king miparis a panibatan.”
~Albert Einstein
“Nung akalingwan tamung itamu metung amung bangsa lalam ning Dyos,
kanita magi tamung bangsang misaldak lalam.”
~Ronald Reagan
“Ing pamisalang a pangpalipi at pangpamanyamba mandatilang pekamasakit ampatan at mapanganib a kaligaligan king labwad king kasalungsungan.”
~John Shattuck
“Ing mabilug a kaligaligan king yatu ya pin ding bolang at bulag a talatuki parati lang makabitasa king sarili da, at ding byasang tau kisna lang kapikakunwan.”
~Bertrand Russell
“Ing bulag a pamnaluki mengaring pali, a magpapali king isip tagana,
dapot paling e makadalise. Susubung na at buburu ing sablang saring kapanamdaman;
dapot ala yang tutud sanu man kareti.”
~William Warburton
“Alang dane king isip ning bulag a talatuki nung nu ing sangkan makalub.”
~Napoleon Bonaparte
“Mingat kang banten ding isipan mu, uling magi lang amanu mu.
Panibalan at banten la ring amanu mu, uling magi lang kimut mu.
Isalangalang at atulan mo irng kimut mu, uling magi lang gawi mu.
Kilalanan at atulan la ring gawi mu, uling ilang maging pamipaulaga mu.
Sanakan at kaulan la ring kekang pamipaulaga, uling ilang magi mung kapalaran.”
~Mahatma Gandhi
***
E la ditak ding sasabi ing balu da ngan ing sabla king pamanampalataya at pati na king kapamalan, o ambisan king nanu-nanu pang bage keti king yatu. Dapot pekamarakal la ring magbyasa-byasa king kasalpantayanan at pamanyamba.
Ating megaral lang labing anam a banwa bang mabyasa karing miyayaliwang sanga ning katutwan lalu na king kapanaligan. Ila ring mibansagang “ecclesiastical guru.” Agya mang atin lang pamisuglung sadya king Ginung Yesukristu, pauli ning mika-alalan la bang apili nung ninu ing maging
pekapun da—e na saguling panwalan ing pamisuglung da kang Kristu uling nung pin ila ring tune talatuki na e na kaylangan pa ing alalan.
Atin namang memasa la mung Biblya at agamat deng masalese at mekilala na la anting pantas uli niti dapot ala lang malino pamisuglung king Ginu o ala lang disciplic succession. Ala lang kikilalanang guru nung e ing Ginu mu mismu kanu. Dapot buri da ituru da katamu.
Nung antita kasi, nung itamu ngan ala tamung kikilalanang guru o spiritual master, ala tamung karapatang manaral o manuru uling itamu mismu e ta miturwanan at mebyasa kapamilatan ning guru. Nung apusan taya ing ninu mang talapanaral a alang kikilalanang guru o kasi dapat ya mismu e ta ya kikilalanang guro? Nanu ing kapasubalyan na o’t ya manaral ya dapot ya e ya kikilala king talapanaral o guru? Malyari yang kutnan antini: “Ala ka palang kikilalanang talaturu o’t buri mu ituru mu kami?”
Ala yang karapatang manuru ing ninu man a manuru a alang kikilalanang talaturu o guru.
Ing katutwan ababalu at abibitasa kapamilatan ding atlung asyas ning
katutwan–guru (talaturu), banal a kasulatan at ing Ginu kilub ding pusu. Dapat ding atlung deti miayun-ayun la king pamipaltutu king nanu mang bage sisyasatan o susuryan. Metung mu ing e mamayun kareti mangabaldugan nang e tutu ing nanu mang pakibalwan.
***
Dake Talabaldugan:
mipabite (pangdiwa) binite, mebite sasaryan at e binalak. English – had someone or something hung unintentionally or subconsciously for whatever reason or reasons. Alimbawa king pamangamit: “Daralakit ya keng kangatba i Bitu inyang mipabite ya keng lubid a kakalawatan na inya mibalik nyamu nung nu ya menibat.”
mipabitin (pangdiwa) binitin, mebitin o migbitin e sasaryan at e binalak. English – grasp or clung on someone or something hung unintentionally or subconsciously for whatever reason or reasons. Alimbawa king pamangamit: “Manana bu ne keng talete ing dalagita inyang mipabitin ya keng sinturun ning katuki nang baintau inya memanyaligakgak la ngan keng ayli deng menakit karela.”
mipabito (pangdiwa) binito, mibito o sinalangat e sasaryan at e binalak. English – dangled from someone or something unintentionally or subconsciously for whatever reason or reasons. Alimbawa king pamangamit: “Pasulapawan ne ing karang-karang nang Kiku inyang mepatad yang bagya ing sati oneng mayap namu at mipabito ya keng akasagana nang guryun.”
mipabukaka (pangdiwa) binukaka, mibukakang e sasaryan at e binalak. English – part or spread out something or someone’s body part/parts or limbs unintentionally or subconsciously for whatever reason or reasons. Alimbawa king pamangamit: “Mipabukaka ya ing awang ning siping ming bale pati na pasbul da inyang linabas ya ing masikan a alisus napun sisilim bayu ke mapun.”
mipabukut (pangdiwa) binukut, mebukut sasaryan at e binalak. English – had someone or something bent or distorted unintentionally or subconsciously for whatever reason or reasons. Alimbawa king pamangamit: “Inyang lalabas ya ing damulag atuklu ne bitis ing bapa ku inya mipabukut ya keng sakit.” Angga na inyang mibulang ya keng gabun at mebusul ya.
***
SADYANG GAWI at AMANU DA RENG KAPAMPANGAN
Magmula king bulan ning Agostu angga nang pa-Pasku usu la reng magtindang atbu kareng sibabalen kanitang ing lalawigan dakal ya pa atbuwan. Deng kabalen kanita mamangus lang atbu balang akit mu. Deng mamisali balatan de ing atbu keng karelang palang a mataram nung sali ka karela kaybat mung memili.
Masali la reng mangakaba byas kesa kareng mabukung atbu uling asno kasaguling angusan at e ka magkasakit nung mayna ka ipan. Makanyan man, ing mayumung dake ning atbu ya pin itang malapit keng uyat. Mu pin, asno kasyas at kasakit angusan.
Ay, kanyaman mamangus atbo! Mu pin, malagad namu ing atbu ngeni at makakalingwan nang ditak ditak oneng bitasa.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.