ANAA ra sa 14 ka mga bag-ong kaso sa Covid-19 ug wala'y patay ang natala sa Dakbayan sa Cagayan de Oro Sabado, Nobyembre 6, 2021.
Matud sa City Health Office, sa 14 ka mga bag-ong mga kaso, upat ang local index nga mga kaso; lima ang local cases with link; tulo ang mga lokal nga authorized persons outside residence (Apors), ug duha ang mga Apors with link.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 20,265.
Ang Cagayan de Oro nakatala usab og pag-ubos sa ihap sa mga aktibo nga kaso.
Aduna nay 511 ka mga aktibo nga kaso karon ang dakbayan, 85 niini na-admit sa Northern Mindanao Medical Center ug uban pang mga ospital sa syudad, 423 ang outpatients, ug tulo ang mga ROFs/LSIs.
Nakatala usab og 27 ka mga Covid-positive nga mga kaso nga karon naka-recover. Anaa na karon sa 18,915 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa sa 839.