Gisaulog sa banay nga Lorejas ang ika-67 nga birthday sa ilang padre de pamilya nga si Isabelo “Beloy” Lorejas Sr. niadtong Nobiyembre 5.
Ang kasaulogan gipahigayon sa ilang panimay sa siyudad sa Sugbo.
Matod ni Dorothy Kay Lorejas-Abraham, ikatulong anak ni Beloy, agi og pagpasalamat sa laing tuig nga nadugang sa kinabuhi sa ilang amahan ang kasaulogan.
Gawas niini, mapasalamaton ang pamilya kay nakasugakod sila taliwa sa krisis sa Covid-19 nga giatubang karon sa tibuok kalibotan.
“It was actually a simple thanksgiving celebration for the family’s guidance, protection and safety for him as the head of the family,” pahayag ni Dorothy.
Uban sa iyang asawa nga si Eleuteria “Terry” Lorejas, mapasalamaton si Beloy sa laing tuig nga naabot, baskug ug himsog ang iyang lawas, ug tibuok ang iyang pamilya.
Lima ka managsuon sila si Dorothy: Junabele, Anthony Bel, Nenie Mae ug si Isabelo Jr.
Wa makatambong sa kasaulogan si Nenie kay tua kini sa laing nasod manarbaho.
Apan kanunay kini mangumusta sa iyang pamilya.
Gibutyag ni Dorothy nga hilig mangolekta og tsinelas ilang amahan hinungdan nga tsinelas ang iyang gihatag nga regalo sa iyang amahan.
Nakadawat usab og kwarta ang ilang amahan gikan sa ubang miyembro sa ilang pamilya.