Kon mokuha ka karon og lisensya sa pagmaneho, lisod ug gastuso na kon itandi sa pipila ka mga tuig nga nanglabay. Sa imo pa lang pagkuha og student permit, kinahanglan moeskwela ka sa usa ka Land Transportation Office (LTO) accredited nga tunghaan sa driving. Kinahanglan nga makapasar ka sa theoretical driving exams.
Sa pagkuha og lisensya na sa pagmaneho, kinahanglan nga makapasar ka sa evaluation sa actual driving. Ang tunghaan mao nay mohatag kanimo og certificate nga nakapasar ka sa evaluation sa actual driving. Kuti ang proseso, di ba?
Apan maayo ni kay sa duha ka stages sa pagkuha og lisensya sa pagmaneho, duna may taas nga seminars ug exams nga imong kuhaon. Kinanglan kang makahibawo sa mga balaud sa trapiko, safe driving ug uban pa.
Apan gikinahanglan nga ang kahibawo sa balaud ubanan usab sa kagamhanan sa higpit nga pagpatuman sa balaud sa trapiko. Mag-unsa man ang kahibawo sa balaud kon haguka ang implementasyon? Dunay mga tawo nga ila na gyud nga nature nga kon wa diha ang tigpatuman sa balaud, molapas sila niini.
Ang disiplina sa karsada wa lang magagikan sa kahibawo sa balaud sa trapiko, naa usab kini sa pagpatuman sa balaud.
EHEMPLO
Kapin sa 100 ka kilometro ang nahimong bike lanes nga naglagbas sa mga karsada sa Dakbayan sa Sugbo. Gidili ang parking sa tanang matang sa mga sakyanan. Apan pila man ka mga drayber nga madakpan kada adlaw tungod sa pag park sa bike lanes?
Nakahibawo ba sila nga gidili? Kaayo, nasayod sila, apan nagpadayon gihapon sa ilang gibuhat. Lainlain sila og mga rason. Apan bisan unsa pa ang rason, ang labing komon mao ang absence sa mga enforcer. Maayo gani karon kay duna nay bike patrollers nga gimugna ni Atty. Gerry Carillo. Mao ni sila ang nakatutok sa pagbantay sa bike lanes.
Dunay mga drayber nga motan-aw sa duha ka mga kilid. Kon way traffic enforcer, molabang bisan green ang signal kay hawan ang karsada. Apan kon dunay traffic enforcers, magpanagana. Duna pay isog kaayo, molapas gyud. Masuko pa kon dakpon.
Mao lagi na, di lang driver’s education ang gikinahanglan, naa ang higpit nga pagpatuman sa balaud aron madisiplina og segurado masikop ang mga badlungon sa dalan.
ORDINANSA
Kay duna na man tay bike lanes, kinahanglan usab nga ipatuman ang balaud nga gipanday alang sa biking community. Di lang kaliton, apan ipakatap ang mga impormasyon pinaagi sa pag-edukar sa mga nagbiseklita sa kadalanan.
Segurado man ko nga ang ordinansa sa Dakbayan sa Sugbo gipasar nga puno sa inputs namong mga sakop sa biking community.
Naa diha ang mga buluhaton sa usa ka siklista alang sa iyang kaluwasan sa karsada. Apil na niini ang higpit nga pagpasul-ob og cycling helmet sa biker. Di ko segurado, but sa biseklita gikinahanglan ang blinkers, labina sa gabii. Alang ni sa visibility.
Kon ang mga awtoridad higpit nga magpatuman sa balaud sa trapiko, mas luwas unta ang atoang mga karsada.