Gi-solo ni Gob. Gwen Garcia si Manila Mayor Isko Moreno dihang nibisita kini sa Sugbo. Gusto sa mga Garcia nga sabtong siya ang gipili sa mga presidentiables.
Sa sayo pa, nagpaisa siya sa kamot ni Sen. Panfilo Lacson. Dayon, nagdungan og isa sa kamot ni Gob. Garcia silang Davao City Mayor Inday Sara Duterte-Carpio ug kanhi senador Bongbong Marcos.
Karon, silang duha ni Kong. Pablo John Garcia ang giisang kamot ni Manila Mayor Isko Moreno.
Tungod niini, atong masabot nga dunay tinguha si Gob. Garcia nga makuha ang mga pro-administration votes ug kining mga anti-administration nga naa kang Yorme Isko.
Daw nangandam sab siya sa posibilidad nga mobiya sa kampo ni Inday Sara. Alang kanako, naay problema ang iyang padayon nga pakigsuod sa kampo nilang Sen. Bong Go. Giingong nasuko man gud ang giingong first family ni Presidente Rodrigo Duterte kang Bong Go tungod sa paghatag og pabor niini sa ikaduhang pamilya sa presidente.
Apan, sa akong nahibaw-an, suod man sab sa gobernadora ang grupo nilang Sec. Noel Felongco. Nagtuo ba ang kampo ni Garcia nga di modayon sa pagdagan si Inday Sara?
Bisan pa man, di ko motuo nga ang duwa karon mao ang padak-anay sa puntil. Kasagaran sa mga mayor sa lalawigan naa PDP-Laban (Cusi wing) tungod sa giingong proteksyon nga makuha tungod kay naa sa administrasyon.
Ang pangutana lang, unsaon kon di na siguro si Gob. Garcia nga magpabilin sa kampo sa mga Duterte. Pananglitan, matinuod nga ang mga Garcia adto na mosuporta kang Isko? Asa padung ang mga mayor?
Kon mag-Isko ang mga Garcia, mosunod ba sila nga mag-oposisyon sa mga Duterte ang mga mayor? Kon mag-oposisyon man, di ba mas angay nga mosuporta sila ni Vice President Leni Robredo?
Alang kanako, angay nga seryuso nga timbangon sa mga Garcia ang ilang desisyon sa Nobiyembre 15, 2021.
Pacquiao
Usa ra sa mga presidentiables nga nibisita sa Sugbo ang wala mobisita kang Gob. Garcia. Ikaduha na nga nibisita si Sen. Manny Pacquiao apan mas gipili pa niini nga moadto sa mga Durano sa Syudad sa Danao ug kang kanhi mayor Tomas Osmeña.
Tingali tungod kini sa iyang mga lider sa Sugbo nga sila si kanhi board member Joeyboy Holganza ug mga sakop sa Promdi nga sila si Mimo Osmeña ug Gaye Yapha.
Samtang si Gob. Garcia nakita nga nagpaisa sa kamot ni Bongbong Marcos, si Pacquiao niadto sa Tisa, Labangon aron mobutang og buwak sa dapit diin gidagit si Fr. Rudy Romano. Nagpasabot kini nga si Pacquiao nia dapig sa mga tawo nga wala makauyon sa diktaduriya ni Marcos.
Atong mabasa nga mas gidani karon ni Pacquiao ang mga kontra ni Marcos ug Duterte dinhi sa Sugbo. Kompetensya niya sa maong demographic mao si Bise Presidente Leni Robredo.
Ug atong nabantayan nga mas daghan ang napundok nga mga tawo si Sen. Manny Pacquiao kay sa ni Yorme Isko Moreno.
Carbon
Nangandam karon ang mga sakop sa Carbon Alliance batok sa Joint Venture Agreement (JVA) tali sa Cebu City Hall ug Megawide Construction Corporation tungod sa gitakdang mga demolisyon labi na sa wala pay Pasko.
Daw nagdali ang Megawide tungod sa kasong gisang-at sa Carbon Alliance, ang internal nga financial problems sa Megawide mismo, ug hapit na ang election campaign period.
Pagbantay
Wala dayon mosud sa hunahuna sa akong amiga nga dili mohatag og mga detalye sa imong bank account sa bisan kinsang manawag sa telepono.
Mao nga duna gyuy laing ni-withdraw sa iyang kwarta nga gideposito sa BDO. Dayon, maglisod ka og paimbestiga kay bisan pag moadto kag National Bureau of Investigation (NBI), di man mohatag ang banko og detalye sa pagpangilad.
Moingon dayon ang banko nga subay ang ilang lakang sa Bank Privacy Law. Ambot, mas mosalig man ang banko sa mga nangilad kay sa tag-iya nga moreklamo nga giilad sila. (DM nako sa @anol_cebu)